Me një lutje për paqen në Evropë e në Ukrainë, kremtuar në kriptën e Kishës monumentale
të të Gjithë Shenjtorëve dhe Viktimave të pafajshme të Atmes, në Minsk, u hapën punimet
e Forumit IV evropian katoliko-ortodoks. Në kryeqytetin bjellorus, më se 35 përfaqësues
të Kishave ortodokse, të pranishme në Evropë dhe të Konferencave ipeshkvnore të kontinentit
(Ccee) i pritën me entuziazëm mesazhet drejtuar, në fillim të punimeve, nga patriku
ekumenik Bartolomeu dhe nga Papa Françesku. Duke kujtuar shtegtimin e tyre të sapopërfunduar
apostolik në Tokën Shenjte dhe përqafimin e 25 majit, në Jeruzalem, dy krerët e Kishave
e vlerësuan lart nismën e Forumit IV, mbledhur për të thelluar rolin e kishave të
krishtera në promovimin e vlerave njerëzore e të krishtera në shoqëritë e sotme evropiane.
Delegatët e Kishave në Evropë u pritën nga autoritetet civile e kishtare të vendit,
posaçërisht nga presidenti i Republikës së Bjellorusisë, nga Hekzarku patriarkal i
gjithë Bjellorusisë, që e mikpret takimin; nga metropoliti Pavel i Minskut e Sluzkut
dhe nga Hekzarku patriarkal i nderit, metropoliti Filaret. Merr pjesë në takim edhe
Metropoliti Hilarion i Volokalamskut, kryetar i departamentit të Patriarkatit të Moskës
për marrëdhëniet kishtare të jashtme. Takimin me temë “Feja dhe larmitë kulturore:
sfida për kishat e krishtera në Evropë” e hapën dy bashkëkryetarët e Forumit, metropoliti
Genadios i Sasimës i Patriarkatit ekumenik dhe kardinali Peter Erdë, kryetar i Ccee.
Punimet do të përfundojnë nesër, më 5 qershor, me paraqitjen publike të mesazhit
përfundimtar. Kujtojmë se Forumi I evropian katoliko–ortodoks u mbajt në vitin
2008 (11-14 dhjetor) në Trento të Italisë, me temë: “Familja: vlerë për njerëzimin”.
I fundmi, në Lisbonë të Portugalisë, në vitin 2013 (5-8 qershor) me temë: “Kriza
ekonomike dhe varfëria. Sfida për Evropën e sotme”.