Kardinali Erdë: të respektohet identiteti i popujve evropianë
Filluan, në Minsk të Bjellorusisë, punimet e Forumit IV Evropian Katoliko-Ortodoks
me temë: “Feja dhe larmitë kulturore: sfida për kishat e krishtera në Evropë”. Marrin pjesë 12 përfaqësues
të Kishave ortodokse e 12 delegatë të Kishës katolike. I pranishëm edhe kardinali
Péter Erdë, kryetar i Këshillit të Konferencave ipeshkvnore të Evropës. Në mikrofonin
e Radios sonë, kujton qëllimin e Forumit:
Përgjigje: - Përpiqemi të
kuptojmë si duhet respektuar krishterisht kjo pasuri, që gjen shprehjen e vet edhe
në larmitë e popujve, të kulturave, të kombeve, sepse Evropa është kontinent i veçantë,
ku ka shumë vende e kombe, që kanë gjuhën e tyre, historinë e tyre, kulturën e tyre,
por që të gjithë, qysh prej një mijë vjetësh, rriten e zhvillohen mbi bazë të frymëzimit
të kristianizmit, prej këndej, mund të themi se feja jonë nuk ia heq veçantitë kulturave,
përkundrazi, i frymëzon, që të gjithë të mund të zhvillojnë gjeninë e tyre, të krijojnë
e të zhvillojnë kulturën e tyre. Bashkëjetesa, prandaj, jo vetëm në frymën e pajtimit,
por edhe të bashkëpunimit, është detyrë shumë veçantë në mbarë Evropën. Përpiqemi
ta vëmë në jetë thirrjen tonë.
Pyetje: - Diçka për sfidat e Kishës së
krishterë në Evropë, në këtë çast?
Përgjigje: - Natyrisht, është kryesisht
shekullarizimi, që ka forma nga më të ndryshmet në Lindje e në vendet ish-komuniste,
ku pas shembjes së marksizëm-leninizmit, mbeti një zbraztësi e ndjeshme kulturore,
e cila e kërcënoi shumë herë mbarë shoqërinë. Për ta shmangur këtë edhe në nivel praktik,
është shumë e rëndësishme, madje e nevojshme, të rizgjohet feja e krishterë, për të
dhënë orientimin e duhur lidhur me bashkëjetesën njerëzore e shoqërore, e edhe për
të përforcuar vetëdijen e vlerës së jetës e të respektit të tjetrit.
Pyetje:
- Pas shtegtimit, kohët e fundit, të Papës Françesku në Tokën Shenjte dhe takimit
të tij me Patriarkun Bartolomeu I, ç’ vlera të veçanta ka ky Forum evropian katoliko-ortodoks?
Përgjigje:
- Sigurisht Patriarkati Ekumenik është njëri nga ato, që përgatit, mbështet e
organizon këtë seri takimesh. I shpreh personalisht mirënjohjen Patriarkut Bartolomeu
e, natyrisht, edhe metropolitit Gennadios së Sassismës, kryetar i Seksionit për marrëdhëniet
e jashtme të Patriarkatit Ekumenik dhe bashkëkryetar i Asamblesë. Marrëdhëniet, pra,
janë të mira, e bashkëpunimi, i ngushtë.
Pyetje: - Do të merreni, gjatë
këtij takimi, edhe me shqetësimet e të krishterëve në Ukrainë e në zonat fqinje… Përgjigje:
- Takimi, natyrisht, nuk është politik. Por ne, si të krishterë, lutemi për paqen
e lutemi edhe që dinjiteti i të gjithëve të respektohet. Edhe situata në Ukrainë vë
në dukje rëndësinë që ka bashkëjetesa, pavarësisht nga larmitë ndërmjet popujve. Ka
shumë kultura, shumë identitete në kontinentin tonë, që duhen respektuar, por edhe
duhen pajtuar. E ne nuk mund të mos lutemi për këtë!