Պաղեստինեան ազգային համաձայնութեան կառավարութիւնը պիտի յայտարարուի այսօր
Պաղեստինեան իշխանութեան նախարար Մահմուտ Ապպաս յայտնեց, որ Համասի հետ ազգային համաձայնութեան
կառավարութիւնը «պիտի յայտարարուի երկուշաբթի օր` հակառակ իսրայէլեան սպառնալիքներուն»: Ապպաս
շաբաթ օր պաղեստինեան դատին զօրակցող ֆրանսացիներու մէկ պատուիրակութեան առջեւ իր արտասանած
խօսքին մէջ ըսաւ. «Իսրայէլացիները մեզի յայտնեցին, որ եթէ կառավարութիւն կազմենք, մեզ
պոյքոթի պիտի ենթարկեն: Միւս օր պիտի յայտարարենք կառավարութիւնը, որ կազմուած է անկախ
եւ ատակ անձերէ, որոնք Ֆաթհի, Համասի կամ որեւէ այլ կազմակերպութեան անդամ չեն»: «Ռոյթըրզ»
երէկ հաղորդեց, որ Իսրայէլի վարչապետ Պենիամին Նեթանիահու նախազգուշացուցած է, որ աշխարհ
պէտք չէ շտապէ ճանչնալու պաղեստինցիներու ազգային միութեան կառավարութիւնը, որ կը հռչակուի
Ֆաթըհ եւ Համաս շարժումներու համաձայնութեան լոյսին տակ: Ըստ լրատու գործակալութեան,
կազմուելիք կառավարութեան մէջ չէզոք քաղաքական կողմնորոշում ունեցող նախարարներու ընդգրկումը
կրնայ դիւրացնել Արեւմուտք-պաղեստինեան նոր կառավարութիւն յարաբերութիւնները: