Միացեալ Նահանգներու եւ Թալեպաններու միջեւ գերիներու փոխանակում
28 տարեկան ամերիկացի ենթասպայ Պոուի Պերկտահլ երէկ Հարաւարեւելեան Աֆղանիստանի մէջ փոխանցուեցաւ
ամերիկեան մասնայատուկ ուժերուն` Թալեպաններուն հետ գերիներու փոխանակման համաձայնութեան
մը ծիրին մէջ: Ուաշինկթըն փոխարէնը ազատ արձակեց Կուանթանամոյի արգելափակման ճամբարին
մէջ գտնուող 5 աֆղան բարձրաստիճան արգելափակեալներ: Փենթակոն քննադատութեան թիրախ
դարձաւ արգելափակման ճամբարէն բանտարկեալներու ազատ արձակումէն 30 օր առաջ Քոնկրեսը տեղեակ
չպահելուն համար: Սակայն պաշտպանութեան նախարար Չաք Հէյկըլ ողջունեց զինուորին ազատ արձակումը:
Աֆղանիստանի նախագահ Համիտ Քարզայ եւս փոխանակման գործողութենէն ետք տեղեակ պահուեցաւ: Քաթարի
արտաքին գործոց նախարարութիւնը յայտարարեց, որ համաձայնութիւնը գոյացած է իր միջնորդութեամբ:
Միացեալ Նահանգներու նախագահ Պարաք Օպամա յայտնեց, որ Քաթարէն ապահովական երաշխիքներ
ստացած է, որ «պիտի որդեգրէ միջոցառումներ` պաշտպանելու համար մեր ազգային ապահովութիւնը»:
Աֆղաններուն պիտի արգիլուի առնուազն մինչեւ մէկ տարի հեռանալ Քաթարէն: «Մայատին» հաղորդեց,
որ Աֆղան բարձրաստիճան պաշտօնատար մը յայտնած է, որ գերիներու փոխանակումը կրնայ երկրին
մէջ խաղաղութեան հոլովոյթին նպաստել: