Paslutjes së Mbretëreshës Qiellore, Papa bëri thirrje për Ukrainën dhe Afrikën
Qendrore: “Me shpirt të trishtuar, lutem për viktimat e tensioneve, që vijojnë
akoma në disa zona të Ukrainës dhe në Republikën e Afrikës Qendrore. Ua përsëris thirrjen
time të gjitha palëve në konflikt, që të kapërcehen moskuptimet e të kërkohet me durim
dialogu e paqëtimi. Maria, Mbretëresha e Paqes, na ndihmoftë! Na ndihmoftë të gjithë,
me ndërmjetësimin e saj amtar”. Më pas Ati i Shenjtë kujtoi se sot kremtohej
Dita Botërore e Komunikimeve Shoqërore, kushtuar, sivjet, komunikimit në shërbim të
kulturës së takimit. E theksoi: “Mjetet e komunikimit shoqëror mund të favorizojnë
ndjesinë e unitetit të familjes njerëzore, solidaritetin dhe impenjimin e të gjithëve
për një jetë dinjitoze. Të lutemi që komunikimi, në çdo lloj forme, t’i shërbejë me
të vërtetë takimit ndërmjet njerëzve, bashkësive, kombeve; takim i bazuar mbi respektin
e dëgjimin reciprok”. Kujtoi, më pas, se në Kolevalenca u shpall e Lume
Nëna Speranca, e lindur në Spanjë, pagëzuar me emrin Maria Jozefa Alhama Valera. E
vendosur, më pas, në Itali, themeloi Shërbëtoret dhe Bijtë e Dashurisë së Mëshirshme.
Dëshmia e saj, u lut Françesku, e ndihmoftë Kishën ta kumtojë kudo, me gjeste konkrete
të përditshme, mëshirën e pafundme të Atit Qiellor për çdo njeri. Ta përshëndesim
të gjithë me një duartrokitje Nënë Sperancen, të Lumen Nënë Speranca, i ftoi Papa
mijëra besimtarët, që mbushnin përplot Sheshin, si çdo të diel. E ata iu përgjigjen
menjëherë, me një stuhi duartrokitjesh, që reshtën vetëm kur Ati i Shenjtë përshëndeti
të rinjtë që sapo kanë marrë ose përgatiten të marrin Krezmimin, duke i inkurajuar
të jenë dëshmitarë gazmorë të Jezusit. E pastaj, një përshëndetje e veçantë për
Kamperistët italianë, domethënë, shtegtarët, që përshkojnë udhët e botës me kamper,
impenjuar në vepra solidariteti si dhe çiklistët, që po vënë në jetë nismën “Një kilometër
për Sirinë”. Papa e përfundoi lutjen, me urimin: “Të gjithëve, ju uroj
të diel të gëzuar. Drekën e mirë e mirupafshim! E, lutuni për mua!”.