Սերպիոյ մէջ ջրհեղեղներուն հասցուցած վնասը գնահատուած է մէկ միլիառ եւրոյով
«Օպոզրեւաթել» կը հաղորդէ, որ Սերպիոյ վարչապետ Ալեքսանտր Վուչիչ յայտարարած է, որ իր
երկրին մէջ ջրհեղեղներուն պատճառած վնասը գնահատուած է շուրջ մէկ միլիառ եւրոյով: Վարչապետը
նշած է, որ արտերկրէն ստացուած օգնութիւնը կրնայ ծածկել վնասին շուրջ քսան առ հարիւրը:
Ըստ անոր, ողողուած շրջաններուն մէջ իրավիճակը կը կարգաւորուի, եւ կառավարութիւնը կազմած
է բնական աղէտէն ետք վերականգնման ծրագիրը: «Բոլոր անոնք, որոնց տուները քանդուած
են, պիտի ստանան նոր տուն», յայտարարած է վարչապետը` հաւաստիացնելով նաեւ, որ պետութիւնը
պիտի հոգայ բոլոր հանրապետական եւ տեղական նշանակութեան ճամբաներու վերակառուցումը: Վուչիչ
խոստացած է, որ պետութիւնը պիտի օգնէ ագարակներուն` տրամադրելով սերմեր, պարարտանիւթեր,
ինչպէս նաեւ մասամբ հատուցելով սատկած անասուններու վնասը: Վարչապետը կը կարծէ, որ
7-8 օր ետք Օպրենովաց քաղաքը, որ ամէնէն շատ տուժած է աղէտէն, «պիտի վերադառնայ բնականոն
կեանքի»: Տակաւին տեղափոխուած մարդոց քաղաք վերադարձը արգիլուած է: