Երբ կը խօսինք ընտանեկան
առաքինի կեանքի մասին ի միտ ունինք այն ապրելաձեւը, որով մարդ կարող է զԱստուած ճանչնալ
եւ զինք սիրել ու աւելի վայելել, որովհետեւ ԶԱստուած ճանչնալով եւ սիրելով` մարդը ինքնաբերաբար
կը սկսի առաքինի գործեր կատարել: Այսօր դժբախտաբար, ականատես ենք բարոյազրկութեան,
այլասերութեան եւ հոգեւոր կեանքի նահանջման: Մարդ արարած կը մտատծէ որ յանուն ազատութեան
կրնայ ամէն ինչ կատարել, ինչ որ կը ցանկայ կրնայ իրականացնել. ամոթի զգացումը գրեթէ գոյութիւն
չունի: Յաճախ մարդուն մտքէն կը վրիպի այն գաղափարը թէ ազատ ըլլալ չի նշանակէր մէկու մը
իրաւունքները ոտնակոխ ընել: Եկեղեցին լուրջ դեր ունի այս խնդիրներուն մէջ: Ան պարտի մարդու
հոգիին մէջ դրոշմել քրիստոնէական այն գաղափարները եւ սկզբունքները, որոնք, դժբախտաբար,
մեր այս աշխարհը կ՛անտեսէ: Երբ կը խօսինք ընտանեկան առաքինի կեանքի մասին մեր միտքը
ունինք այն առաքինութիւնները որոնք դաստիարակութեամբ ձեռք կը ձգենք, ինչպէս նաեւ այն
առաքինութիւնները որոնք մեզի որպէս շնորհք կը տրուին Աստուծմէ: Առաքինութիւնը բարիք
ընելու ունակական եւ հաստատ տրամադրութիւն մըն է: «Առաքինի կեանքին նպատակը կը կայանայ
Աստուծոյ նմանելու մէջ» կ՛ըսէ Ս. Գրիգոր Նիւսեցին: Առաքինութիւնները այն տրամադրութիւններն
են, որոնք մեր արարքները կը կանոնաւորեն, մեր կիրքերը կը կարգաւորեն եւ մեր վարքը կ՛ուղղեն
իմացականութեան եւ հաւատքին համեմատ: Անոնք են` խոհեմութիւնը, արդարութիւնը, զօրութիւնը
եւ ժուժկալութիւնը: Խոհեմութիւնը այն գիտակցութիւնն է որ կ՛օգնէ մեր իսկական բարիքը
զանազանելու եւ զայն գործադրելու յարմար միջոցները ընտրելու: Արդարութիւնը մնայուն
եւ հաստատ կամքն է ուրիշին տալու ինչ որ ուրիշին իրաւունքն է: Աստուծոյ հանդէպ արդարութիւնը
կոչուած է « կրօնի առաքինութիւն»: Զօրութիւնը դժուարութիւններու մէջ ընտանիքին կ՛ապահովէ
հաստատամտութիւն, իսկ բարիին հետապնդումին մէջ` վճռակամութիւն: Ան մարդը կարող կը դարձնէ
ի հարկին մինչեւ իսկ իր կեանքը զոհելու` արդար դատի մը պաշտպանութեան համար: Իսկ
ժուժկալութիւնը` հաճոյքներուն հրապոյրը կը չափաւորէ, կ՛ապահովէ կամքին ինքնատիրացումը
բնազդներուն դէմ եւ մարդս ատակ կը դարձնէ ստեղծագործութեան բարիքներուն գործածութեան
մէջ իր հաւասարակշռութիւնը պահպանելու: Սակայն կան նաեւ յոյժ կարեւոր առաքինութիւններ
որոնց աղբիւրը, դրդապատճառն ու անմիջական առարկան` Ինք Աստուա՛ծ է: Անոնք քրիստոնեային
բարոյական գործելակերպը կը հիմնաւորեն ու կը կենդանացնեն ինչպէս նաեւ մարդկային առաքինութիւնները
կը կենսաւորեն: Անոնք են` Հաւատք, Յոյս եւ Սէր: Հաւատքը այն առաքինութիւնն է, որուն
շնորհիւ կը հաւատանք Աստուծոյ եւ Անոր բոլո՛ր յայտնածներուն, զորս Եկեղեցին մեզի կ՛առաջարկէ
որ հաւատանք: Հաւատքով` մարդը ինքզինք ազատօրէն Աստուծոյ կը յանձնէ, այս պաճառով ան
որ կը հաւատայ, կը փնտռէ ճանչնալ Աստուծոյ կամքը եւ զայն կատարել իր արօրեայ կեանքին
մէջ: Յոյսը այն առաքինութիւնն է, որուն շնորհիւ մենք յաւիտենական կեանքը կը բաղձանք
եւ զայն Աստուծմէ կ՛ակնկալենք իբր մեր երանութիւնը: Իսկ Սէրը այն առաքինութիւնն
է, որուն շնորհիւ կը սիրենք զԱստուած ամէն բանէ վեր եւ մեր մերձաւորը, մեր կեանքի ընկերը
մեր անձին պէս` Աստուծոյ սիրոյն համար: Յիսուս զայն Օրէնքի լրում կարգեց: Ան «կատարելութեան
զօդն է» եւ հի՛մը միւս բոլոր առաքինութիւններուն: Առանց սիրոյ` ես ոչինչ եմ եւ ընտանեկան
եւ ամուսնական կեանքը դատարկ է: