Святы Айцец: хрысціянскую радасць не купіць, яна нараджаецца ў надзеі
Ваш смутак зменіцца
ў радасць – гэта абяцанне Езуса было ў цэнтры ўвагі папы Францішка падчас гаміліі
на ранішняй Эўхарыстыі ў Доме св. Марты 30 мая 2014 г. Пантыфік адзначыў, што “не
ўсё жыццё – свята”, людзі пакутуюць ад хваробаў, праблем у сям’і, недахопу грошай
і многіх іншых рэчаў. Але, перш за ўсё, гэтым асобам Езус кажа: “Не бойцеся!”. Многія,
на думку Пантыфіка, імкнуцца да такой радасці, ад якой у душы можа застацца толькі
смутак і пустка. Яны ўзнікаюць, калі ідзем кепскім шляхам, калі ідзем, каб “купляць
радасць, весялосць, якія паходзяць ад гэтага свету” і з’яўляюцца грэшнымі. Пантыфік
адзначыў, што хрысціянская радасць – іншая. Гэта “радасць у надзеі”, якая не мінае.
“У момант выпрабавання мы яе не бачым. Гэта радасць, якая ачышчаецца выпрабаваннямі
і нават выпрабаваннямі штодзённымі”, - сказаў ён. Езус, каб патлумачыць вучнямі словы
пра смутак, які перамяняецца ў радасць, прывёў прыклад жанчыны, якая нараджае дзіця.
“Сапраўды, нараджаючы, жанчына шмат пакутуе, але, калі дзіця нараджаецца, забываецца
пра гэта. Тое, што застаецца – гэта радасць Езуса, ачышчаная радасць”, - сказаў Папа.
Паводле Яго, радасць схавана ў жыццёвых момантах, яна не адчуваецца падчас пераадолення
праблем – прыходзіць потым. Таму Касцёл заклікае сённяшніх людзей не баяцца і дзяліцца
з іншымі надзеяй, адзначыў Пантыфік і заклікаў заўсёды быць мужнымі ў выпрабаваннях
і памятаць, што пасля цемры заўсёды наступае святло.