Më 8 qershor, Dita e Rrëshajve, takimi i lutjes për Lindjen e Mesme, në Vatikan
Takimi i lutjes për paqen, në të cilin Papa Françesku ftoi presidentin e Izraelit,
Shimon Peresh dhe atë të Palestinës, Mahmud Abas, do të mbahet më 8 qershor, pasdite,
në Vatikan. Kjo datë, Dita e Rrëshajve, kur Shpirti i Shenjtë zbriti mbi apostujt
dhe shën Marinë, u pranua nga të dyja palët, siç njofton komunikata e Sallës së Shtypit
të Vatikanit. Për rëndësinë e këtij takimi, të dëgjojmë Sekretarin e Shtetit të Vatikanit,
kardinali Pietro Parolin: Është takim lutjeje.
Papa e sheh në perspektivën e lutjes si forcë për paqen. Sigurisht, do të ketë një
kuptim simbolik të madh fakti që presidenti palestinez e ai izraelit takohen së bashku.
Pastaj, kemi vlerën shtesë, që është ajo e lutjes: së bashku, do të luten. Shpresojmë
që aty ku kanë dështuar përpjekjet e njeriut, Zoti t’u japë të gjithëve urtinë e forcën
për një plan të vërtetë paqeje, t’ua përforcojë besimin e t’i nxisë të kapërcejnë
pengesat e shumta e të rënda, që edhe sot, nuk e lejojnë paqen të arrijë në Tokën
Shenjte. …Nisma të tilla i impenjojnë pjesëmarrësit e lutja bëhet forcë e veprim. Ja
ç’na tha edhe përgjegjësi për mediat, gjatë udhëtimit papnor në Tokën Shenjte, atë
David Neuhaus, që flet me telefon nga Jeruzalemi: Mendoj se [takimi] është
shumë i rëndësishëm. Pati një mori gazetarësh, që thanë: “Papa tani luan një rol,
në të cilin Kerry (sekretari i shtetit amerikan) nuk ia doli dot! Pra, a mos Papa
i zë vendin Kerry-t?”. E unë: “Jo, Papa merret me një përmasë tjetër për kërkimin
e paqes”… përmasë, shpesh e harruar, por që për ne është më e rëndësishmja: lutja.
Kjo është detyra e Papës! “Të dashur palestinezë e izraelitë, të qëndrojmë përballë
Zotit! E provuam e nuk ia arritëm të përurojmë një periudhë dialogu. Ç’do të ndodhë
nëse shkojmë para Zotit, në lutje, në heshtje, duke e pyetur veten: kush jam unë para
Hyjit?”