Некалькі дзён застаецца
да пачатку IV Еўрапейскага праваслаўна-каталіцкага форума, які адкрыецца ў беларускай
сталіцы 2 чэрвеня 2014 г. У Мінску збяруцца іерархі, святары, тэолагі з 20 краін Еўропы.
Форум пройдзе пад сустаршынствам Мітрапаліта Генадзіўса Сасімскага, прадстаўніка Канстантынопальскага
Патрыярхату, і арцыбіскупа Пэтэра Эрдо, старшыні Канферэнцыі Каталіцкіх Біскупаў Еўропы.
Таксама чакаюць іншых высокіх гасцей – кардыналаў з боку Каталіцкага Касцёла, епіскапаў
з боку Беларускай і Рускай Праваслаўных Царкваў, а таксама прадстаўнікоў іншых памесных
Праваслаўных Цэркваў.
Тэма размовы як ніколі актуальная – “Рэлігія і культурны
плюралізм: выклікі для хрысціянскіх Цэркваў Еўропы”. Сёння, ва ўмовах глабалізацыі,
тэрытарыяльна і культурна розныя традыцыі маюць аднолькавыя выклікі: секулярызацыя
і рэлятывізм, біяэтыка, рэлігійная адукацыя, псеўдарэлігійныя плыні – і гэта не поўны
спіс. Таму больш падрабязна ўдзельнікі форума спыняцца на такіх пытаннях як: неабходнасць
межрэлігійнага дыялогу ў сучасных умовах, свабода рэлігіі як шлях да справядлівасці
і міру, маральнае адраджэнне Еўропы, паведамілі ў Міжнародным грамадскім аб’яднанні
“Хрысціянскі адукацыйны цэнтр св. Мятода і св. Кірыла”. Увогуле, задача будучага форума
– аб’яднаць сілы хрысціянскай супольнасці, у першую чаргу праваслаўных і католікаў,
для абароны традыцыйных каштоўнасцяў і пераадолення глыбокага духоўнага, сацыяльнага
і геапалітычнага крызісу, які існуе сёння ў свеце.
А Мінск для гэтай мэты
– найлепшая пляцоўка. У Беларусі традыцыйна захоўваюцца добрыя адносіны паміж хрысціянскімі
канфесіямі, краіна не раз станавілася цэнтрам міжканфесійнага і міжрэлігійнага дыялогу.
Папярэднія канферэнцыі (па чарзе ў краінах з праваслаўнай і каталіцкай большасцю насельніцтва)
прайшлі ў мінулыя гады ў італьянскім Трэнта, на грэцкім Родасе і ў партугальскім Лісабоне.
А ў 2014 г. беларуская сталіца была абрана для правядзення наступнага, IV Еўрапейскага
форума.
Відавочна, такія сустрэчы заўсёды выклікаюць вялікую цікавасць – як
у рэлігійных, так у свецкіх колах, як сярод хрысціянскіх лідэраў, так і сярод прадстаўнікоў
іншых рэлігій. Рэзанаса чакаюць і ў Мінске. Акрамя афіцыйных пасяджэнняў, гэта яшчэ
добрая магчымасць для Цэркваў лепш пазнаць адна адну і падзяліцца вопытам, а таксама
ў голас заявіць – паглыбленне крызісу не спыніць, калі ў свеце далей будуць ігнараваць
вельмі простыя з аднаго боку, але вырашаючыя і асноватворныя рэчы – духоўныя аспекты
чалавечай прыроды і грамадства. Па выніках IV Еўрапейскага праваслаўна-каталіцкага
форума, які будзе праходзіць да 6 чэрвеня, удзельнікі прымуць сумесную рэзалюцыю.