Նախագահ Սլէյմանի նստաշրջանի աւարտով Լիբանան կը թեւակոխէ նախագահական դատարկութեան հանգրուան
Հանրապետութեան նախագահ զօր. Միշել Սլէյման շաբաթ, 24 մայիս 2014-ին աւարտեց նախագահական
իր նստաշրջանը եւ առանց զայն երկարաձգելու մեկնեցաւ Պաապտայէն` Լիբանանը մատնելով նախագահական
դատարկութեան Բ. հանգրուանի մը: Թաէֆի համաձայնագիրէն ետք առաջին անգամ ըլլալով նախագահական
դատարկութեան յաջորդած նախագահ Սլէյման նախագահական պալատէն մեկնեցաւ նոյն անորոշութեամբ`
թափուր ձգելով նախագահական աթոռը: Վեցամեայ իր գործունէութիւնը աւարտած նախագահ Սլէյմանին
հրաժեշտի արարողութեան ներկայ էին վարչապետ Թամմամ Սալամ, նախկին վարչապետներ Նեժիպ Միքաթի
եւ Ֆուատ Սինիորա, մեծ թիւով նախարարներ եւ քաղաքական անձնաւորութիւններ, որոնց շարքին`
Ընկերվար յառաջդիմական կուսակցութեան ղեկավար, երեսփոխան Ուալիտ Ժոմպլաթ, Փաղանգաւոր
կուսակցութեան ղեկավար Ամին Ժեմայէլ եւ մեծ թիւով պետական պաշտօնատարներ, բանակի հրամանատար
զօր. Ժան Քահուաժի եւ պատասխանատուներու հոծ բազմութիւն մը: Հրաժեշտի ձեռնարկէն բացակայեցան
Հըզպալլայի ներկայացուցիչները, ինչպէս նաեւ Փոփոխութիւն եւ բարեկարգում համախմբումի նախագահ,
երեսփոխան զօր. Միշել Աուն: Պաապտայի «25 մայիս» անուան դահլիճին մէջ իր արտասանած
մեկնումի ճառին մէջ, նախագահ Սլէյման շեշտեց, որ իր սահմանադրական պատասխանատուութիւններէն
մեկնելով` ինք պիտի ստորագրէ յատուկ շրջաբերական մը, որուն հիման վրայ խորհրդարանը պիտի
հրաւիրէ օրէնսդրական նիստերու արտակարգ ժամանակաշրջանի: Նախագահ Սլէյման հաստատեց,
որ ինք բոլոր ժամանակներուն ընթացքին ճիգ չէ խնայած Լիբանանի գերագոյն շահերը պաշտպանելու: Ան
նշեց, որ Լիբանան կը գտնուի երեսփոխանական ընտրութեանց սեմին, հետեւաբար անհրաժեշտ է
վաւերացնել ընտրական օրէնք մը, որ ճշգրիտ ներկայացուցչութիւն կ՛ապահովէ` պահպանելով խորհրդարանին
իսլամ-քրիստոնեայ հաւասարութիւնը: Նախագահ Սլէյման յայտնեց նաեւ, որ Լիբանանի մէջ
կրնան արձանագրուիլ շարք մը միջադէպեր, որոնք կրնան կառավարութեան որդեգրելիք միջոցառումներուն
արագ կարիքը ունենալ: Ան շեշտեց, որ ժամանակը հասած է արդէն, որ Լիբանան վաւերացնէ
իր պաշտպանութեան ռազմավարութիւնը` իբրեւ լիբանանեան պետութեան կերտումի անհրաժեշտ հիմք:
«Բռնագրաւուած հողերուն ազատագրումը կը մնայ պակասաւոր, եթէ կարելի չըլլայ երկրին գերիշխանութեան
պահպանումը ապահովել եւ լիբանանեան պետութեան հակակշիռը բանեցնել` ամբողջ Լիբանանի տարածքին: «Լիբանանի
Ազգային երկխօսութեան նիստը եւ լիբանանեան պետութիւնը` իբրեւ ամբողջութիւն, հրաւիրուած
են ամրապնդելու ազգային երկխօսութեան սկզբունքը», հաստատեց ան: Նախագահ Սլէյման շեշտեց,
որ օրէնսդիրներու կողմէ կազմուած յանձնախումբ մը մշակած է երկրին սահմանադրութիւնը փոփոխութեան
ենթարկելու յատուկ ծրագիր մը, որ պէտք է քննարկուի կառավարութեան կողմէ: Նախագահ Սլէյման
շաբաթ օր ուղղուեցաւ Եարզէի իր բնակարանը, իսկ յաջորդ օր ան ուղղուեցաւ Ամշիթ, ուր արժանացաւ
ժողովրդային ընդունելութեան: