Папа да святароў і законнікаў: працягваць ісці за Езусам нягледзячы на нашы слабасці,
памылкі і здрады
Пасля кароткага прыватнага
візіту да Патрыярха Канстантынопальскага, які прыходзіў у царкве на Аліўнай гары,
папа Францішак прыбыў на сустрэчу з святарамі, законнікамі і семінарыстамі, што навучаюцца
і нясуць служэнне ў Святой Зямлі. Яна праходзіла ў касцёле, які знаходзіцца ў Гефсіманскім
садзе. Паводле Пантыфіка, “у гэту ўнутраную прастору, дзе вяршылася драма свету”,
трэба ўваходзіць з адмысловай пашанай, “амаль на пальчыках”. Менавіта ў Гефсіманскім
садзе “наследаванне Хрыста становіцца складаным і нявызначаным; тут пераважаюць сумневы,
стомленасць і страх”. “Ва ўмовах блізкасці мукі Езуса, вучні па-рознаму пачынаюць
адносіцца да Настаўніка – ёсць салідарнасць, адыход, няўпэўненасць”, - заўважыў Францішак.
Ён запрасіў усіх пакліканых – біскупаў, святароў, кансэкраваных асоб, семінарыстаў
– паставіць сабе пытанне: “Хто я ў адносінах да майго пакутуючага Пана? Ці належу
да тых, хто, запрошаны Езусам чуваць з Ім, засынае і замест малітвы спрабуе ўцячы,
заплюшчваючы вочы на рэальнасць?”.
Папа нагадаў, што сяброўства Езуса адносна
пакліканых, Яго вернасць і міласэрнасць, з’яўляюцца бясцэнным дарам, які “заахвочвае
працягваць з упэўненасцю ісці за Ім, нягледзячы на нашы слабасці, нашы памылкі, і
нашы здрады”. “Але дабрыня Пана не вызваляе нас ад пільнасці супраць спакушальніка,
граху, зла і здрады, якія можна сустрэць таксама і ў святарстве, і ў манаскім жыцці”,
- адзначыў Святы Айцец.
Францішак нагадаў, што Бог “у сваёй вялікай дабрыні
і бясконцай міласэрнасці заўсёды бярэ нас за руку, каб мы не патанулі ў моры панікі.
Ён заўсёды ля нас, ніколі не пакідае нас у адзіноце”. Ён заклікаў святароў, законнікаў
і семінарыстаў не быць пераможанымі страхам і роспаччу, але з мужнасцю і ўпэўненасцю
ісці наперад па сваім шляху і ў сваёй місіі.