Gjatë vizitës tek Muri Perëndimor i Jeruzalemit, Papa Françesku u lut për pak minuta
në heshtje, duke e prekur murin me dorën e djathtë. Në fund të lutjes vuri aty zarfin
me tekstin e “Atynës”, shkruar me dorë në spanjisht. Papa la një shënim në spanjisht
në Librin e Nderit të Murit Perëndimor. Shënimi citon Psalmin 121: “Ç’gëzim, kur më
thanë: ‘Të shkojmë në shtëpinë e Zotit!’. Tani këmbët tona ndalen tek dyert e tua,
Jeruzalem”. Këtij citimi Papa i shtoi edhe fjalët: “Me këto ndjenja gëzimi për vëllezërit
e mi më të mëdhenj, erdha dhe i kërkova Zotit hirin e paqes”. Në vijim, pasi u
prit nga presidenti izraelian Shimon Peres dhe nga kryeministri Benyamin Netanyahu,
Papa Françesku shkoi në mausoleumin e Malit Herzl, për të vendosur lule mbi varrin
e Theodor Herzl-it, themelues i lëvizjes sioniste. Ndalesa u bë sipas protokollit
të ri të Izraelit për vizitat zyrtare të krerëve të shteteve. Pastaj, me kërkesë të
kryeministrit Netanyahu, u ndalua shkurtimisht pranë një lapidari në afërsi të mauzoleut,
që kujton viktimat e terrorizmit.