Пантыфік: міжрэлігійны дыялог не можа рэлятывізаваць хрысціянскай веры
Следствам міжрэлігійнага
дыялогу не можа быць рэлятывізацыя хрысціянскай веры, адзначыў папа Францішак у сваім
звароце з нагоды 50-й гадавіны Папскай рады па міжрэлігійным дыялогу. Пантыфік нагадаў,
што гэта было ясна сфармулавана з самага пачатку, калі Павел VI заснаваў гэту дыкастэрыю.
Вядзенне міжрэлігійнага дыялогу не азначае адмовы ад глыбокага жадання абвяшчаць усім
радасць сустрэчы з Хрыстом. Францішак звярнуў увагу, што стварэнне Сакратарыяту па
справах не-хрысціян, папярэдніка Папскай рады па міжрэлігійным дыялогу, адбылося ў
кантэксце ІІ Ватыканскага Сабору, калі Касцёл кіраваўся шчырым жаданнем сустрэчы і
дыялогу з усім чалавецтвам.
Святы Айцец адзначыў, што і сёння Касцёл хоча суправаджаць
кожнага чалавека, як Хрыстус суправаджаў вучняў з Эмаус. Такая гатоўнасць ісці разам
яшчэ больш неабходна ў наш час, адзначаны глыбокім і ніколі дагэтуль невядомым узаемадзеяннем
паміж рознымі народамі і культурамі. Пантыфік запэўніў, што Касцёл заўсёды будзе браць
удзел у дыялогу і паглыбляць супрацоўніцтва з усімі, хто належыць да іншых рэлігійных
традыцый і падзяляе яго прыхільнасць развіваць сяброўскія адносіны.