Սոմայի Ածխահանքի փլուզման հարցով 18 անձեր ձերբակալուած են։
«Հիւրրիյէթ Տէյլի Նիուզ» կը հաղորդէ, որ երէկ Թուրքիոյ Սոմա նահանգին մէջ գտնուող ածխահանքի
փլուզման արկածին շուրջ կատարուած հետաքննութեան ծիրին մէջ ձերբակալուած են շուրջ 18
անձեր, ներառեալ` ածխահանքը շահագործող ընկերութենէն բարձրաստիճան պաշտօնատարներ, որոնց
շարքին են Սոմա ածխահանքի ընկերութեան գործադիր ղեկավար Ռամազան Տողրու եւ աւագ ճարտարապետ
Աքըն Չելիք: Թրքական «Էն.Թի.Վի.» պատկերասփիւռի կայանը հաղորդեց, որ դատախազներ կասկածեալներէն
հինգը դատարան ուղարկած են` պահանջելով զանոնք ձերբակալել:Նշենք, որ 13 մայիսին տեղի ունեցած արկածի զոհերուն թիւը բարձրացած է 301-ի:
Մինչ այդ, ածխահանքի մուտքը աղիւսով պատուեցաւ, երբ իշխանութիւնները կոչ ուղղեցին վերջ տալու փրկարար գործողութիւններուն: Ածխահանքին մէջ բոլոր աշխատանքները եւս դադրեցան, եւ միայն արկածին շուրջ հետաքննութիւն կատարող ոստիկաններուն եւ դատախազներուն կ՛արտօնուի մուտք գործել հանքավայր:
| All the contents on this site are copyrighted ©. |