Даклад: фінансавая атмасфера ў Ватыкане значна палепшылася
У 2013 г. ватыканская
нарматыўна-прававая база і працэдуры маніторынгу фінансавай сістэмы Святога Пасаду
і Дзяржавы Ватыкан значна палепшыліся, вынікае са спецыяльнага паведамлення Бюро фінансавай
інфармацыі, апублікаванага 19 мая 2014 г. Упершыню, у пачатку 2014 г., была праведзена
інспекцыя ў Інстытуце рэлігійных спраў – Ватыканскім банку. Абноўленая прававая база
дапамагае эфектыўна змагацца з фінансавымі злачынствамі, супрацоўнічаць з замежнымі
калегамі і значна палепшыць нагляд за патэнцыйнымі фінансавымі парушэннямі, гаворыцца
ў паведамленні. Міжнародныя эсперты пацвердзілі, што сёння ў Апостальскай Сталіцы
і Ватыкана ёсць “эквівалентная сістэма” для папярэджання і барацьбы з фінансавымі
злачынствамі, якая знаходзіцца ў адпаведнасці з міжнароднымі стандартамі.
Бюро
фінансавай інфармацыі адзначыла значны рост паведамленняў аб падазроных аперацыях:
у 2012 г. іх было 6, а ў 2013 г. ужо 202. Гэта, на думку кіраўніка ватыканскай установы
Рэнэ Брульхарта, адлюстроўвае развіццё прававой базы і істотнае паляпшэнне прафілактыкі
фінансавай злачыннасці. Колькасць запытаў з боку Бюро да камептэнтных замежных органаў
таксама ўзрасла, з 1 – у 2012 г., да 28 – у 2013 г. Ватыканская ўстанова звярталася
з запытамі да сваіх замежных калег у 2013 г. 53 разы. У 2012 г. такіх выпадкаў было
толькі 3.
У 2013 г. Бюро фінансавай інфармацыі стала членам “Групы Эгмант”,
глабальнай сеткі фінансавай разведкі, і падпісала двухбаковыя пагадненні па ўзаемным
супрацоўніцтве ў галіне барацьбы з адмываннем грошай і фінансавання тэрарызму. Мемарандумы
аб узаемаразуменні былі падпісаны з Германіяй, Італіяй, Нідэрландамі, Славеніяй і
ЗША.
Паменшылася колькасць дэкларацый аб трансгранічным перавозе наяўных грашовых
сродкаў. Гэта адбываецца, калі на тэрыторыю Ватыкана або ў адваротным напрамку асоба
ўносіць або выносіць з сабой суму, якая перавышае ў эквіваленце 10 тыс. еўра. Колькасць
такіх дэкларацый у 2013 г. склала 1557 для выходных грашовых сродкаў ( у 2012 – 1782)
і 550 для ўваходных наяўных (у 2012 – 598). Гэта звязана з павышэннем кантролю з боку
кампетэнтных органаў і ўвядзеннем узмоцненых працэдур па наглядзе.
У пачатку
2014 г. Бюро правяло інспекцыю ў Інстытуце рэлігійных спраў – Ватыканскім банку па
праверцы ажыццяўлення мер, прынятых для прадухілення і барацьбы з адмываннем грошай
і фінансаваннем тэрарызму. Яна паказала істотны прагрэс, дасягнуты банкам на працягу
апошніх 12 месяцаў. У выніку праверкі быў распрацаваны план дзеянняў для поўнай адаптацыі
працэдур да патрабаванняў новага ватыканскага заканадаўства і арганізацыйных пераўтварэнняў.