Gjatë natës së djeshme, rreth orës 02:58, qendra e Shqipërisë është lëkundur nga një
tërmet 5,2 ballësh të shkallës Rihter. Duket se epiqendra ka qenë diku afër Lushnjës,
44 km në jug të Tiranës. Pas tërmetit fillestar, toka është lëkundur edhe shtatë herë
të tjera. Fatmirësisht, nuk ka pasur të lënduar, por dëme materiale. Në Lushnjë është
shembur një banesë e janë dëmtuar rreth 20 të tjera; në Cërrik janë dëmtuar 3 pallate
dhe 3 shkolla; në Gramsh, 10 shtëpi e pastaj, 2 në Belsh e 1 në Bërzhitë të Tiranës.