Papa në lutjen Mbretëreshës Qiellore: përgojimet nuk sjellin harmoni
“Konfliktet në Kishë zgjidhen duke u ballafaquar, duke diskutuar, duke u lutur”. Kështu
u shpreh sot Papa Françesku në lutjen e Mbretëreshës Qiellore. Papa, pastaj, u lut
për popullsitë e dëmtuara nga përmbytjet në Ballkan dhe kujtoi se dje, në Rumani,
u shpall i Lum ipeshkvi Anton Durkoviçi, martir i fesë.
Duke u ballafaquar,
duke diskutuar, duke u lutur: kështu zgjidhen konfliktet në Kishë. E theksoi Papa
Françesku, në Lutjen e Mbretëreshës Qiellore: “Duke u ballafaquar, duke diskutuar,
duke u lutur! Të sigurt se përgojimet, zilitë, xhelozitë, nuk mund të sjellin kurrë
pajtim, harmoni, as paqe”. Në këtë udhë mund të na shndrisë dhurata e Shpirtit
Shenjt, që të dimë ta nderojmë njëri-tjetrin e të bashkohemi gjithnjë më shumë në
fenë e në dashurinë e krishterë, me zemër të hapur për nevojat e vëllezërve: “Kur
ia lëmë udhëheqjen Shpirtit Shenjt, Ai na çon drejt harmonisë, unitetit, respektimit
të dhuratave e talenteve të ndryshme. A e kuptuat mirë? Të marrin fund përgojimet,
fund zilitë, fund xhelozitë”. Nga ana tjetër, kujtoi Ati i Shenjtë, edhe
në Kishën e zanafillës nuk mungonin tensionet e mosmarrëveshjet, siç ndodh edhe sot
në famullitë tona: “Në jetë nuk mungojnë konfliktet, problemi është
si përballohen!”. Kur bashkësia e parë e krishterë, e përbërë nga njerëz
të një kulture e të një etnie të vetme, asaj judaike, nisi të zgjerohej, duke ua hapur
portat mjediseve kulturore greke, në gjirin e krishterimit, që për vullnet të Jezusit,
u përket mbarë popujve, lindën vështirësitë e para: pakënaqësitë, ankimet, zërat,
që i kundërviheshin njëri-tjetrit lidhur me ndihmën ndaj njerëzve të varfër. Atëherë
Apostujt bënë një mbledhje të zgjeruar, ku merrnin pjesë edhe dishepujt, për të diskutuar
së bashku, të gjithë: “Problemet nuk zgjidhen duke u mbuluar, duke
bërë sikur nuk ekzistojnë! E është gjë e bukur kur ballafaqohen haptas barinjtë e
besimtarët e tjerë”. Rezultati ishte ndarja e detyrave. Apostujt vendosën
t’i kushtohen lutjes dhe shërbimit të Fjalës së Zotit, ndërsa shtatë njerëz, diakonë,
shërbimit të sofrave për të varfërit: këta u zgjodhën, sepse njerëz të ndershëm, me
emër të mirë, përplot me Shpirtin Shenjt e me urti. Pas kremtimit të lutjes së
Mbretëreshës Qiellore, Papa kujtoi përmbytjet e mëdha, që dëmtuan rëndë zona të
tëra të Ballkanit, posaçërisht të Serbisë e të Bosnjë-Hercegovinës: “Ndërsa
ia besoj Zotit viktimat e kësaj fatkeqësie natyrore, u shpreh afërsinë time personale
të gjithë atyre, që po jetojnë orë ankthi e trazire”. Më pas Papa kujtoi
se dje, në Rumani, u shpall i Lum ipeshkvi Anton Durkoviçi, martir i fesë. I persekutuar
nga regjimi komunist rumun, shpjegoi Papa, vdiq në burg nga etja e uria, në vitin
1951: “Së bashku me besimtarët e Jashit e dhe të mbarë Rumanisë, falënderojmë
Zotin për këtë shembull”. Duke përshëndetur rreth 50 mijë besimtarët dhe
shtegtarët e mbledhur në Sheshin e Shën Pjetrit, Papa inkurajoi, më në fund, shoqatat
e vullnetariatit, në Ditën kushtuar të sëmurit onkologjik dhe u lut për të sëmurët
e familjet e tyre.