Старшыня Папскай рады па справах сям’і: сёння ідзе гаворка аб адсутнасці бацькі
Сям’я займае вядучую
пазіцыю ў адносінах да ўсіх грамадскіх інстытутаў, якія павінны ад яе вучыцца і на
ёй грунтавацца. Аб гэтым на форуме Арганізацыі Аб’яднаных Нацый у Нью-Ёрку нагадаў
старшыня Папскай рады па справах сям’і. У сувязі з ААН-аўскім Днём Сям’і, які адзначаецца
15 мая, арцыбіскуп Вінчэнца Палья прыняў удзел у сустрэчы, падрыхтаванай прадстаўніцтвам
Святога Пасаду пры Арганізацыі. Ён спаслаўся на тэму сёлетняга Дня, а менавіта, салідарнасці
паміж пакаленнямі.
“Думаю, што ёсць неабходнасць аднаўлення адносін паміж пакаленнямі,
- распавёў Ватыканскаму радыё арцыбіскуп Палья. - Сёння ідзе гаворка аб адсутнасці
бацькі. Многія бацькі адмовіліся ад абавязкаў, адказнасці і клопатаў выхавання. Калі
нехта кажа: “Я твой сябар”, гэта азначае, што не разумее, у чым сутнасць абавязку
бацькі”. Іерарх перакананы, што Касцёл мае патрэбу ў тэрміновым абнаўленні падыходу
да пытання адносін паміж пакаленнямі, каб такім чынам дапамагчы грамадству.
“Сёння
існуе тэндэнцыя ствараць грамадства без сям’і. Гэта праяўляецца, напрыклад, у стварэнні
так званых няпоўных сем’яў. Мы адракаемся ад адносін з іншымі людзьмі, бо звязваць
сябе з кімсьці, і рабіць гэта на ўсё жыццё, стала нечым непрымальным. Але гэта азначае,
што ў рэшце рэшт грае ролю выключна маё эга. Такім чынам, аднак, ад сновы разбіваюцца
грамадскае жыццё і грамадскія адносіны паміж людзьмі”, - лічыць арцыбіскуп Вінчэнца
Палья.