Папа да новых паслоў: гандаль зброяй і вымушаная міграцыя – выклікі для міру
Гандаль зброяй і вымушаная
міграцыя – гэта два выклікі, на якія трэба адказаць у працэсе будавання міру на планеце,
лічыць папа Францішак. 15 мая 2014 г. ён прыняў даверчыя граматы ў новых паслоў Швейцарыі,
Ліберыі, Эфіопіі, Судана, Ямайкі, Паўднёва-Афрыканскай Рэспублікі і Індыі, якія будуць
выконваць дыпламатычную місію пры Апостальскай Сталіцы. Сваю прамову да сабраных Пантыфік
прысвяціў міру – мэце, якая ніколі не была дасягнута цалкам і да якой павінны імкнуцца
ўсе пакаленні, адказваючы на выклікі, якія ставіць кожная эпоха. Адным з такіх актуальных
выклікаў Папа лічыць гандаль зброяй. “Усе кажуць пра мір, усе абвяшчаюць аб жаданні
яго, але, на жаль, распаўсюджванне ўзбраенняў рознага кшталту вядзе ў адваротным напрамку.
Гандаль зброяй прыводзіць да ўскладнення і аддалення мірных рашэнняў, асабліва таму,
што часта ён здзяйсняецца незаконна”, - сказаў Францішак. Ён заклікаў на новага этапу
сканцэнтраваных і адважных намаганняў супраць распаўсюджвання ўзбраенняў.
Іншым
выклікам, паводле Святога Айца, з’яўляецца вымушаная міграцыя. У ёй прысутнічаюць
два супрацьлеглыя элементы: з аднаго боку, цудоўныя гісторыі людзей, якія здолелі
выбрацца “з нечалавечых умоваў і знайсці годнасць, свабоду і бяспеку”, а з іншага,
гісторыі асоб, якія выклікаюць “слёзы і сорам”, калі “нашы браты і сёстры, дзеці Божыя,
жадаючыя жыць і працаваць у спакоі, вымушаны здзяйсняць небяспечныя для жыцця падарожжы,
сустракацца з шантажом, катаваннямі і рознага кшталту злоўжываннямі, каб часам закончыць
жыццё ў пустыні або на дне мора”, адзначыў Пантыфік.
Паводле Папы гандль зброяй
і вымушаная міграцыя звязаны паміж сабой. “Было б абсурдным супярэчаннем казаць пра
мір, весці мірныя перамовы, і ў той жа час спрыяць гандлю зброяй і дазваляць яго.
Трэба сказаць, што было б цынічна абвяшчаць правы чалавека і адначасова ігнараваць
ці не клапаціцца пра людзей, вымушаных пакідаць свае землі, паміраць, спрабуючы зрабіць
гэта, не сустрэўшы міжнароднай салідарнасці”, - адзначыў Францішак.
Святы Айцец
запэўніў новых паслоў, што Апостальская Сталіца жадае працягваць супрацоўніцтва на
карысць пераадолення гэтых феноменаў і ісці шляхамі, якія вядуць да справядлівасці
і міра.