Traktat i devocionit të vërtetë për Marinë: “Maria në Kishën shenjte”, par. 30, 31
I tronditur rëndë nga rreziqet e kësaj jete, që shpesh ka më shumë lot se gëzime,
njeriu kërkon etshëm një strehë, nën të cilën mund të struket në ditë rrebeshesh.
Kërkon gëzim, mes lotësh; breg, mes dallgësh; dritë, mes errësire. Kërkon dorën e
nënës në rrëzime, si në ditët e miturisë. Çdo njeri, deshi s’deshi, e ndjen në shpirt
se veç nënës e atit, që e nxorën në dritën e kësaj bote, ka edhe një Atë e një Nënë
qiellore, gati për t’ia shtrirë dorën në ditë të kthjellta e të zymta. Këtë na kujton
sot “Traktati i devocionit të vërtetë për Marinë”, shkruar nga Shën Luigji Maria Grignion
de Monfort, në paragrafet 30, 31 të kapitullit “Maria në Kishën shenjte”.
30. Ashtu
si në krijimin natyror e në atë njerëzor është një baba e një nënë, edhe në krijimin
e mbinatyrshëm e shpirtëror është një baba, Hyji e një nënë, Maria. Të gjithë bijtë
e vërtetë të Hyjit e besimtarët e vërtetë kanë atë Hyjin e mëmë, Marinë. Kush nuk
e ka mëmë Marinë, nuk e ka as Hyjin atë. Prandaj ata, që nuk besojnë, heretikët, skizmatikët,
etj etj., që e mënijnë, e përbuzin ose nuk e përfillin fare Virgjërën e Shenjtë, nuk
mund ta kenë Hyjin atë, ndonëse pretendojnë, sepse nuk e kanë nënë Marinë: po ta kishin
Nënë, do ta donin e do ta nderonin, ashtu si biri i denjë, natyrisht, e do dhe e nderon
nënën e vet, që i dhuroi jetën. Shenja më e sigurt e më e pagabueshme për ta dalluar
heretikun ose njeriun e doktrinës së keqe, ose akoma, atë që nuk beson, nga besimtari
i vërtetë, është përçmimi a indiferenca që heretiku e ai, që nuk beson, kanë për Virgjërën
e Shenjtë. Këta njerëz përpiqen, me fjalë e me shembull, t’ia zbehin kultin e dashurinë,
haptas a fshehtas, nganjëherë edhe duke u maskuar pas preteksteve, në dukje të mira.
Mjerisht Hyji Atë nuk i tha Marisë ta ngulte banesën e saj ndërmjet tyre, sepse janë
si Ezau.
31. Hyji Bir dëshiron të përftohet e, në se mund të themi, të mishërohet
çdo ditë në gjymtyrët e veta, përmes Nënës së Tij të dashur. Prej këndej, edhe i thotë:
“Merre si trashëgim Izraelin!”. Si të donte t’i thoshte: Hyji, Ati im, m’i la trashëgim
mbarë kombet e tokës, njerëzit e mirë e të këqinj, besimtarë e jo besimtarë: unë u
prij, të parëve me skeptër ari, të dytëve, me fshikull hekuri; do të jem atë e mbrojtës
për të parët, fshikullues i drejtë, për të dytët e për të gjithë, gjykatës. Po ti,
Nëna ime e dashur, do t’i trashëgosh e do t’i zotërosh vetëm ndjekësit besnikë, që
simbolizohen në Izraelin e, si nëna e tyre e mirë, do t’i nxjerrësh në dritë, do t’i
mëkosh e do t’i bësh të rriten; si mbretëresha e tyre, do t’u prish, do t’i drejtosh,
do t’i mbrosh.