Papa në audiencën e përgjithshme: shenjtorët e panjohur na mësojnë ç’është dhurata
e qëndresës
Janë shenjtorë “të fshehur” në Kishë, ata që na mësojnë ç’është dhurata e qëndresës.
Ishte ky mendimi kryesor i katekizmit, shtjelluar nga Papa Françesku në audiencën
e përgjithshme, mbajtur, si zakonisht, në Sheshin e Shën Pjetrit, përballë më se 60
mijë shtegtarësh e besimtarësh. Ta luftojmë përtacinë e të mos na lëshojë kurrë zemra,
porositi Papa, duke i kërkuar Zotit forcën, që buron nga feja.
Shenjtorë
pa kem, pa elter, pa kamare për trupore, që të lutemi a të ndezim një qiri para shëmbëllimit
të tyre. Shenjtorë me mish e eshtra, që ndoshta banojnë fare pranë nesh, pas portës
pranë, e megjithatë, nuk i njohim, sepse të fshehur pas velit të së përditshmes. Ose
kemi fatin t’i njohim e të shijojmë fenë e tyre të patundur, edhe pse pa aureolë.
Këta njerëz, i siguroi Papa besimtarët, kanë të përbashkët me shenjtorët e kanonizuar,
një dhuratë që vjen nga lart: qëndresën. Françesku e shpjegoi këtë dhuratë të posaçme
të Shpirtit Shenjt, duke marrë si shembull një përmasë të dashur për Kishën, shenjtërinë
e fshehur, të panjohur, atë, vijoi, që shndrit sidomos në çaste të vështira e në
situata të rrezikshme, kur burra e gra detyrohen të përballojnë tensione tronditëse
e të dhimbshme, që e trazojnë keqas jetën e tyre e të të dashurve të tyre: “Sa
e sa burra e gra, që ne nuk ua dimë emrat, e nderojnë popullin tonë, e nderojnë Kishën,
sepse janë të fortë: njerëz që e çojnë përpara jetën e tyre, familjen e tyre, punën,
fenë, në heshtje, pa bujë, me qëndresë të pashoqe! Po, këta vëllezër e motra janë
shenjtorë, shenjtorë të së përditshmes, shenjtorë të panjohur, të fshehur mes nesh:
kanë pikërisht dhantinë e qëndresës në kryerjen e detyrave si njerëz, si etër, si
nëna, si vëllezër, si motra, si qytetarë. Shumë, kemi shumë”. E në këta shenjtorë
pa emër, dhurata shpirtërore e qëndresës sjell fryte të prekshme. Papa Françesku i
shpjegoi me Shëmbëlltyrën e Bujkut, që hedh farën e Fjalës në truall, domethënë, në
zemra, herë të mira, herë të shterpëta, herë të brishta: “Me dhuratën e qëndresës
Shpirti Shenjt e pastron truallin e zemrës sonë, e liron nga plogështia, nga pasiguria
e nga të gjitha druajtjet, që mund ta frenojnë, në mënyrë që Fjala e Zotit të vihet
në jetë me vërtetësi e gëzim. Është ndihmë e madhe, kjo dhuratë e qëndresës, që të
jep forcë e të liron edhe nga shumë pengesa”. Por nuk duhet menduar se qëndresa
është dhuratë vetëm për çaste të vështira. Papa Françesku u shpreh shumë qartë për
këtë: çdo ditë të jetës sonë, theksoi, duhet të jemi të fortë, sepse çdo ditë ka trazirën
e vet, barrën e vet të rëndë, frikën e vet. Të jeni të fortë e të qëndrueshëm çdo
ditë, por me kusht që ‘fara’ e qëndresës të bjerë në zemra të përvuajtura, domethënë,
në tokë pjellore: “Shën Pali Apostull ka thënë ca fjalë, që na bëjnë mirë t’i
dëgjojmë: ‘Gjithçka mundem, në Atë, që më jep forcë!’. Prandaj kur vjen jeta e zakonshme,
kur trazira e telashe na trokasin te porta, ta kujtojmë këtë: ‘Gjithçka mundem, në
Atë, që më jep forcë’. Zoti jep forcë, gjithnjë, e nuk mungon kurrë, kur kemi nevojë.
Ai është përherë pranë nesh. Prandaj: ‘Gjithçka mundemi në Atë, që na jep forcë!”.