Святы Айцец: казаць аб праблемах прама, а не пляткарыць
Папа Францішак духоўна
блізка да пакутуючых на Блізкім Усходзе і ва Украіне. Пра гэта Пантыфік расказаў падчас
сустрэчы з рэктарамі і навучэнцамі рымскіх Папскіх калегіўмаў, якая прайшла 12 мая
2014 г. у ватыканскай Зале Паўла VI. Звяртаючыся да семінарыстаў з Блізкага Усходу
і Украіны Святы Айцец прызнаўся: “я вельмі блізка да вас ў гэты момант пакутаў”. Ён
запэўніў навучэнцаў у сваёй малітве. Аўдыенцыя адбылася без афіцыйнай прамовы, але
ў форме пытанняў і адказаў. Гаворачы пра навуковую фармацыю семінарыстаў, Папа папярэдзіў
аб рызыцы “акадэмізма”. “Біскупы пасылаюць вас, каб атрымалі навуковую ступень і таксама,
каб вярнуліся ў дыяцэзіі. Але ў дыяцэзіях вы павінны працаваць у прэзбітэрыўме, як
прэзбітэры”, - падкрэсліў Святы Айцец.
Францішак нагадаў пра чатыры стаўпы
святарскай фармацыі: духоўную, навуковую, камунітарную і апосталькую падрыхтоўку.
Паводле Папы, акрамя вучобы, тыя хто атрымлівае адукацыю у Рыме, павінны клапаціцца
пра адносіны са сваімі бліжнімі, а таксама пра ўласнае духоўнае жыццё – штодзённа
ўдзельнічаць у св. Імшы, маліцца і займацца апостальствам. “Калі удзяляецца ўвага
толькі акадэмічнай частцы, існуе рызыка сыходжання ў ідэалогію”, - сказаў Папа і адзначыў,
што гэта “нездарова”. Так становіцца нездаровым усведамленне пра Касцёл, які немагчыма
зразумець без малітвы, супольнага жыцця і апостальскай дзейнасці, лічыць Папа.
Паводле
Святога Айца падрыхтоўка да святарства ў супольнасці вельмі важная, бо так можна навучыцца
пераадольваць праблемы, сябраваць і дзяліцца з іншымі. “Нашмат лепш кепская семінарыя,
чым “не семінарыя”, - сказаў Папа.
Пантыфік заклікаў не абмяркоўваць існуючыя
праблемы за спіной, але казаць пра іх прама. Ён расказаў гісторыю, як 22 гады таму,
яго малады сакратар, прама раскрытыкаваў адно з яго рашэнняў – з павагай, але прама.
“Калі ён выйшаў я падумаў: гэтага сакратара я ніколі ад сябе не аддалю: ён сапраўдны
брат!”, - сказаў Папа.