Më 12 maj përkujtohen Shën Nereu dhe Akuileu. Sipas traditës së përçuar nga
Papa Damasi, ishin dy ushtarë, të cilët u kthyen në fenë e krishterë duke parë forcën
e martirëve. U dënuan në Romë nën perandorin Dioklecian, u mbytën me shpatë dhe u
varrosën në varrezat e Domitilës.
Më 13 maj përkujtohet Zoja e Fatimës,
e cila iu duk për herë të parë tre barinjve të vegjël pikërisht në këtë datë, më 1917.
Zoja iu duk gjashtë herë Luçisë së Jezusit, Françeskut dhe Gjaçintës dhe u la një
mesazh për mbarë njerëzimin. Ipeshkvi i Leirisë, në letrën baritore me rastin e mbylljes
së pesëdhjetëvjetorit të dukjeve të Zojës, pohoi se mesazhi i Fatimës “përmbledh një
përmbajtje doktrinore aq të gjerë, sa mund të pohohet me siguri se nuk i shpëton asnjë
temë themelore e fesë sonë të krishterë…”.
Më 14 maj përkujtohet Shën
Matia Apostull. Për Matinë flitet në kapitullin e parë të Veprave të Apostujve, kur
e thërrasin për të plotësuar numrin dymbëdhjetë, duke zëvendësuar, kështu, Judën Iskariot.
E zgjedhin me short, ndër dy kandidatët që kishin qenë nxënës të Jezusit qysh nga
pagëzimi në lumin Jordan. Tjetri ishte Jozefi, i quajtur Barsaba. Pas Rrëshajëve Matia
fillon të predikojë, si të gjithë apostujt e tjerë. Nuk kemi lajme të sakta për mënyrën
dhe vendin e vdekjes së tij. Tradita thotë se u martirizuan në Jeruzalem dhe se më
vonë Shën Helena, nëna e perandorit Kostandin, e mbarti trupin e tij në Trier, ku
nderohet edhe sot.
Më 15 maj përkujtohet Shën Izidori, bujk. U lind
në Madrid rreth vitit 1070 dhe u largua nga shtëpia shumë i ri, për të punuar si bujk.
Falë punës së tij, fushat, që deri atëherë prodhonin pak, u bënë shumë pjellore. Merrte
pjesë në meshë çdo ditë dhe i kushtonte aq shumë kohë lutjes, saqë disa nga bashkëpuntorët
e paditën se i hiqte kohën punës. Kur Madridin e pushtuan Almoravidët, u zhvendos
në Torrelaguna, ku u martua me një grua me emrin Mari. Familja e Izidorit dhe e Marisë
ishte strehë e sigurtë për të varfërit. Asnjë i varfër nuk u largua nga shtëpia e
tij pa një lëmoshë. Vdiq më 15 maj 1130 dhe turpi i tij ruhet në kishën e Shën Andresë
në Madrid.
Më 16 maj përkujtohet i Lumi Vladimir Gjika. U lind në Stamboll
më 1873 nga një familje shqiptaro-rumune dhe u kthye nga ortodoksia në katolicizëm,
më 1902, në Romë, gjatë studimeve për filozofi dhe teologji. Deshi të shugurohej meshtar
ose murg, por Papa Piu X e këshilloi t’i kushtohej apostullimit si laik. Pas shumë
shërbimesh të çmueshme për Kishën si laik, u shugurua meshtar në vitin 1923. Nga ky
vit, u dërgua nga Selia e Shenjtë në Sidney, Budapest, Dublin, Buenos Aires, ku mori
pjesë në kongreset eukaristike ndërkombëtare. Kreu misione apostolike edhe në Japoni,
Kinë e Ceylon. Vdiq ndër torturat e sigurimit, në një burg komunist në Rumani. Ndër
provat e shumta, paraqitur nga dioqeza e Bukureshtit për lumnimin e tij, janë edhe
dokumentet, që u gjetën në arkivat e ish policisë politike të regjimit dhe dëshmitë
e shokëve të burgut.
Më 17 maj përkujtohet Shën Pjetër Liu Venjuan,
katekist kinez i martirizuar në vitin 1834 për shkak të fesë në Krishtin.