Françesku: bezdisini meshtarët e ipeshkvijtë, që të jenë barinj të mirë
Bezdisini barinjtë tuaj, që t’ju prijnë mirë, t’ju japin qumështin e doktrinës e të
hirit”. Është nxitja e Papës Françesku drejtuar besimtarëve, pas Meshës për shugurimin
e 13 meshtarëve të rinj, gjatë lutjes së Mbretëreshës Qiellore, kremtuar në Sheshin
e Shën Pjetrit. Ati i Shenjtë nënvizoi se sot të shumtë janë ata, që tregohen të gatshëm
të na ‘shërbejnë’ si barinj të jetëve tona. Por vetëm Jezusi është i vetmi bari, që
jep jetën e pasosur. Më pas u drejtoi një përshëndetje të posaçme nënave, në ditën,
që u kushtohet.
Dhembshuri,
dashuri e dhurim, për të pasur jetën me begati. Këtë gjejmë në lidhjen që Jezusi,
Bariu i Mirë, për të cilin flet Ungjilli i së dielës, ka me dishepujt e vet. E pikërisht
kjo lidhje, nënvizoi Papa Françesku, është modeli i marrëdhënieve ndërmjet të krishterëve
e edhe i të gjitha marrëdhënieve njerëzore: “Shumë, edhe sot, ashtu
si në kohët e Jezusit, paraqiten si ‘barinj’ të jetëve tona; por vetëm i Ngjalluri
është bariu i vërtetë; na jep jetë me begati. I ftoj të gjithë të kenë besim tek Zoti,
që na prin. E jo vetëm na prin, por edhe na shoqëron, ecën me ne. Ta dëgjojmë me mendje
e zemër të hapur Fjalën e Tij, për ta ushqyer fenë tonë, për ta ndriçuar ndërgjegjen
tonë e për t’i ndjekur mësimet e Ungjillit”. Papa u kërkoi besimtarëve
t’i ndihmojnë ipeshkvijtë e meshtarët, që të jenë barinj të mirë. Shtytjen e mori
nga një shkrim i Shën Çezarit të Arles, i cili e krahason popullin e Hyjit me një
viç qumështor, që ka uri e dëshiron të thithë qumështin e lopës, nënës së vet, e
cila, me sa duket, nuk do ta lëshojë: “E ç’bën atëherë viçi? Troket me turi
në thithkën e lopës, që të vijë qumështi. E bukur, kjo figurë! Kështu edhe ju, thotë
shenjti, duhet të jeni me barinjtë: të trokisni gjithnjë në portën e tyre, në zemrën
e tyre, që t’ju japin qumështin e doktrinës, qumështin e hirit, qumështin e drejtimit’.
Ju kërkoj, e ju lutem, t’i bezdisni barinjtë, t’i trazoni barinjtë, të gjithë ne,
barinjtë, që t’ju japim qumështin e hirit, të doktrinës e të drejtimit. Të na bezdisni!”. Duke
i përngjarë Krishtit, tha Papa, nësa kujtonte Evangelii Gaudium, çdo bari nganjëherë
do të prijë para, për t’i treguar rrugën e për t’i dhënë shpresë popullit; herë tjetër
do të rrijë ndërmjet të gjithëve me afërsinë e tij të thjeshtë e të mëshirshme, e,
në rrethana të tjera, do t’i duhet të ecë pas popullit, për t’i ndihmuar ata, që kanë
mbetur mbrapa. E Ati i Shenjtë uroi …: “që të gjithë barinjtë të jenë kështu!
Po ju, mërzitini barinjtë, që t’ju japin drejtimin e doktrinës e të hirit”. E,
në Ditën botërore të lutjes për thirrjet, Papa nënvizoi se thirrja për ta ndjekur
Jezusin është entuziaste e, njëkohësisht edhe impenjative. Që të realizohet, shtoi,
është e nevojshme gjithnjë të hysh në miqësi të thellë me Zotin, për të mundur, kështu,
të jetosh me Të e në Të: “Të lutemi për të rinjtë; ndoshta këtu, në Shesh,
është ndonjë, që e dëgjon këtë zë të Zotit, i cili e thërret për rrugën e meshtarisë:
të lutemi për të, nëse është këtu, e për gjithë të rinjtë, që janë kështu”. Në
çastin e përshëndetjeve drejtuar shtegtarëve, ardhur si zakonisht me shumicë, Papa
theksoi posaçërisht një nismë, kushtuar Ungjillëzimit të ri: “Përshëndes
Bashkësinë Neokatekumenale, që këto të diela të Kohës së Pashkëve, po e çon kumtin
e Krishtit të ngjallur në 100 sheshe të Romës e në shumë qytete të botës. Zoti ju
dhëntë gëzimin e Ungjillit. E shkoni përpara ju, që jeni të zotët”. Më
pas Papa përshëndeti të gjithë fëmijët e të rinjtë, që marrin këto ditë Kungimin e
Parë dhe i ftoi të tërë të luten në mënyrë të posaçme, për të gjitha nënat, në ditën
që u është kushtuar: “Ju ftoj t’i kushtoni një kujtim të bukur e një
lutje të gjitha nënave. T’i përshëndesim nënat! T’ia besojmë Nënës së Jezusit; ta
lusim Zojën e Bekuar për nënat tona e për të gjitha nënat (Falemi Mari).
Një përshëndetje madhështore nënave! Një përshëndetje madhështore!”.