50 Տարուան ընդմիջումէ ետք. Կիպրոսի բռնագրաւուած հատուածի Հայկական Ս. Աստուածածին Եկեղեցւոյ
մէջ Պատարագ պիտի մատուցուի 10 Մայիսին
Կիպրոսի Հայոց առաջնորդարանի Դիմատետրի էջը կը հաղորդէ, որ վաղը ժամը 12:00-ին 1963-էն
ետք առաջին անգամ ըլլալով Հին Նիկոսիոյ հին հայկական բաժինին մէջ գտնուող Ս. Աստուածածին
եկեղեցւոյ մէջ պատարագ պիտի մատուցուի: Եկեղեցին, որ Թուրքիոյ կողմէ հիւսիսային Կիպրոսի
բռնագրաւումին պատճառով կիպրահայ համայնքին համար անհասանելի մնացած էր, վատ վիճակի մէջ
կը գտնուէր: Միացեալ Նահանգներու օժանդակութեան եւ ՄԱԿ-ի զարգացման գործակալութեանց,
կրօնական ղեկավարներու, քաղաքական կազմակերպութեանց եւ դիւանագէտներու միացեալ ջանքերով
եկեղեցին կարելի եղած էր վերանորոգել: Մարտի սկիզբը եկեղեցւոյ վերանորոգութեան առիթով
մշակութային երեկոյ մը կազմակերպուած էր: Թրքական «Սոնտաքիքա» կայքը իր կարգին կը
հաղորդէ, որ կիպրական խորհրդարանին մէջ հայերու ներկայացուցիչ Վարդգէս Մահտեսեան նշած
է, որ կիրակի օրուան պատարագը պիտի տեւէ մէկ ժամ: Տարբեր քաղաքներէ մեծ թիւով հայեր
յունական կողմէն քալելով պիտի անցնին թրքական հատուած: Մահտեսեան նշած է, որ կիրակնօրեայ
պատարագով հետաքրքրուած են Կիպրոսի Հանրապետութեան մէջ Միացեալ Նահանգներու եւ Սլովաքիոյ
դեսպանները, կրօնական եւ քաղաքական գործիչներ: