Папа заклікаў чыноўнікаў ААН да сапраўднай этычнай мабілізацыі
Пантыфік сустрэўся
9 мая 2014 г. у Ватыкане з вядучымі службовымі асобамі устаноў, фондаў і праграм Арганізацыі
Аб’яднаных Нацый, якія праводзяць у гэтыя дні ў Рыме сваю нараду. Ён падзякаваў сабраным
за “намаганні дзеля забеспячэння міру ва ўсім свеце, павагі чалавечай годнасці, абароны
самых бедных і найбольш уразлівых слаёў насельніцтва, і гарманічнага эканамічнага
і сацыяльнаага развіцця”. Але многае яшчэ “павінна быць дасягнута”, лічыць Пантыфік.
Яго непакоіць тое, што “важная частка чалавецтва працягвае не мець доступу да пладоў
прагрэсу і на самой справе аднесена да статусу грамадзян другога гатунку”. Устойлівае
развіццё, падкрэсліў Папа, звязана наўпрост з рэальным вырашэннем пытання галечы і
голаду, дасягненнем больш істотных вынікаў у абароне навакольнага асяроддзя, забеспячэннем
годнай і прадукцыйнай працы для ўсіх, абаронай сям’і. Яно ўключае ў сябе супрацьстаянне
розным формам несправядлівасці: “эканоміцы выключэння”, “культуры адходаў” і “культуры
смерці”.
Францішак прывёў прыклад біблійнага Закхея, які пасля сустрэчы з Хрыстом
прыняў радыкальнае рашэнне аднавіць справядлівасць. “Гэты ж дух павінен быць у пачатку
і ў канцы ўсёй палітычнай і эканамічнай дзейнасці” і прывесці сучасных палітыкаў і
фінансістаў да смелых рашэнняў, лічыць Папа. “Гісторыя Езуса і Закхея вучыць нас,
што вышэй за эканамічныя і сацыяльныя сістэмы і тэорыі заўсёды будзе неабходнасць
шчодрай, эфектыўнай і практычнай адкрытасці на патрэбы іншых”, - адзначыў Пантыфік.
Францішак заклікаў чыноўнікаў ААН да “сапраўднай этычнай мабілізацыі”, заснаванай
на агульным для ўсіх ідэале братэрства і салідарнасці, асабліва ў адносінах да самых
бедных і выключаных.