Papa: Kisha në Etiopi e në Eritre, shembull solidariteti
Sot paradite, Papa Françesku priti ipeshkvijtë e Etiopisë dhe të Eritresë, në Vatikan,
për vizitën e tyre “ad Limina”. Ati i Shenjtë i falenderoi për impenjimin e tyre bamirës,
duke kujtuar gjendjen e popullsive të zhytura në varfëri, edhe për shkak të konflikteve
të shumta, fatkeqësive natyrore e thatësirës, probleme të zakonshme për Bririn e Afrikës.
Kisha Katolike në këto dy vende, të cilat e kanë dëshmuar Krishtin që në agim të krishterimit,
ka programe shoqërore, që frymëzohen nga Ungjilli, sidomos për fëmijët e mbetur jetimë
për shkak të dhunës e të varfërisë. Papa përmendi edhe të rinjtë, që detyrohen të
marrin rrugën e rrezikshme të mërgimit, në kërkim të një jete më të mirë. Papa
Françesku lavdëroi punën e misionarëve, që kontribojnë në shtimin e bashkësive kishtare
lokale e në konsolidimin e tyre, duke u përpjekur t’i kumtojnë gjithë shoqërisë mesazhin
e Krishtit e jo vetëm atyre, që e njohin. Ipeshkvijtë e Etiopisë dhe të Eritresë i
nxiti të jenë etër të mirë me priftërinjtë. Vetë meshtarët duhet të kenë një formim
të gjithanshëm, human, shpirtëror, intelektual dhe baritor e të sillen me njëri-tjetrin
si vëllezër të vërtetë, duke mbartur mbi supe peshën e problemeve të përbashkëta.
I njëjti kujdes u duhet kushtuar laikëve, nënvizoi Papa, i cili vlerësoi hapat
e bëra për formimin e tyre katekistik e për përfshirjen e të rinjve në jetën kishtare.
Është e nevojshme që burrat e gratë e dy vendeve afrikane të dinë t’i orientojnë të
rinjtë për t’i dhënë kuptim jetës së tyre e për të kërkuar sigurinë e së ardhmes,
në një kohë kur mundësia për të gjetur punë është më e vogël. Në fund, Papa falenderoi
ipeshkvijtë për impenjimin në favor të të moshuarve, "dëshmi e pranisë së Zotit mes
jush", u tha, e hir i jashtëzakonshëm për njerëzit.