Францішак: касцёльная бюракратыя не павінна перашкаджаць евангелізацыі
Папа Францішак перасцярог
ад празмернай бюракратыі ў Касцёле, якая можа перашкодзіць евангелізацыйнай дзейнасці.
Падчас ранішняй Эўхарыстыі ў Доме св. Марты 8 мая 2014 г. Пантыфік пракаментаваў урывак
з Кнігі Дзеяў Апосталаў пра навяртанне вяльможы эфіопскай каралевы Кандакі, якому
паспрыяў апостал Філіп. Паводле Папы, у гэтым фрагменце прысутнічаюць тры важныя хрысціянскія
рысы: паслухмянасць Святому Духу, здольнасць весці дыялог і давер да Божай ласкі.
Францішка адзначыў, што апостал Філіп пачуў заклік Бога ісці да павозкі эфіопскага
вяльможы і адразу яму падпарадкаваўся. “Пакінуў усё і пайшоў. Гэта дазваляе зразумець,
што без паслухмянасці Божаму голасу ніхто не можа евангелізаваць, абвяшчаць Езуса
Хрыста”, - сказаў Папа.
Святы Айцец заўважыў, што Філіп не прымушаў вяльможу
прыняць Евангелле, але вёў з ім дыялог – паважаў духоўную адкрытасць свайго суразмоўцы,
які чытаў урывак са Святога Пісання і не мог яго зразумець. “Нельга евангелізаваць
без дыялога”, - сказаў Папа і дадаў, што неабходна заўсёды лічыцца з іншай асобай
і прысвячаць час на тое, каб падзяліцца з ёй Добрай Навінай.
Словы апостала
Філіпа выклікалі ў эфіопскага вяльможы жаданне прыняць хрост. Вучань Пана зрабіў гэта
– “перадаў яго ў рукі Бога, Яго ласкі”, адзначыў Пантыфік. Францішак падкрэсліў, што
Божая ласка важнейшая за бюракратыю, якая часта стварае перашкоды евангелізацыі, перашкаджае
людзям сустрэцца з Богам. “Няхай Пан дапаможа нам зразумець гэта”, - пажадаў Святы
Айцец.