Ռայի Պատրիարքին կողմէ Յորդանան, Երուսաղէմ Եւ մերձակայ շրջաններ կատարելիք այցելութիւնը`
լուսարձակի տակ
Մարոնի համայնքի Պշարա Ռայի պատրիարքը Լուրտի Ս. Աստուածածին եկեղեցւոյ մէջ կիրակի, 4
մայիսին, մատուցեց կիրակի օրուան պատարագը, որուն ընթացքին իր արտասանած քարոզին մէջ
շեշտեց, որ իսկական հրաշքը այն է, որ մարդ արարածը ամէնօրեայ դրութեամբ արթնցնէ իր հաւատքը
եւ բուժէ իր հոգին: Ան նշեց, որ Ֆրանչիսկոս պապը մնայուն կերպով կոչ ուղղած է Միջին Արեւելքի
տագնապներուն խաղաղ լուծումներ գտնելու, «եւ պէտք է ընդգծել, որ ներողամտութիւնը, երկխօսութիւնն
ու հաշտութիւնը Միջին Արեւելքի խաղաղութեան ազդակներն են»: Նշենք նաեւ, որ 24-26 մայիսին
Ֆրանչիսկոս պապին Ս. հողեր` Յորդանան, Երուսաղէմ եւ մերձակայ շրջաններ կատարելիք այցելութեան
ընթացքին Ռայի պատրիարքին ընկերակցութիւնը լուսարձակի տակ առնուած է եւ ներքին լիբանանեան
առումով տարակարծութիւններու դուռ բացած: Այդ պատճառով մարոնի եկեղեցին եւ հոգեւորականները
յաճախակի յայտարարութիւններ կը կատարեն, ընդգծելու համար, թէ Ռայի պատրիարքին կատարելիք
այդ այցելութիւնը հովուապետական է: Միւս կողմէ, Ռայի պատրիարքը ընդվզած է նախագահական
ընտրութեան առումով յառաջացած միջմարոնիական տագնապներէն, յատկապէս նկատի ունենալով այն
իրականութիւնը, որ մարոնի ղեկավարները մնայուն կերպով կը դրժեն միասնական մնալու իրենց
խոստումը: