Папа сустрэнецца з Вярхоўным Патрыярхам і Каталікосам усіх армян
Папа Францішак прыме
на аўдыенцыі Вярхоўнага Патрыярха і Каталікоса ўсіх армян Гарэгіна ІІ, які 7-9 мая
2014 г. будзе знаходзіцца з візітам у Рыме. Сустрэча адбудзецца 8 мая. Яе ўдзельнікі
супольна памоляцца і правядуць кароткую сустрэчу. Акрамя таго, армянскі іерарх наведае
Папскую раду спрыяння хрысціянскаму адзінству і некаторыя іншыя дыкастэрыі Апостальскай
Сталіцы. Патрыярх памоліцца каля магілы св. Пятра і ўшануе статую св. Грыгорыя Асветніка,
якая знаходзіцца ў паўночным дворыку ватыканскай базылікі.
Гарэгін ІІ быў абраны
132-м кіраўніком Армянскай Апостальскай Царквы ў 1999 г. Ён наведваў Вечны горад у
2000 г. з нагоды Вялікага юбілею хрысціянства, а ў 2001 г. сустракаўся з Янам Паўлам
ІІ ў рамках Апостальскага візіту Пантыфіка ў Арменію. Гарэгін ІІ таксама прысутнічаў
на пахаванні нядаўна кананізаванага Папы. У 2008 г. і 2012 г. ён сустракаўся з Бэнэдыктам
XVI, а ў сакавіку 2013 г. прысутнічаў на інаўгурацыі пантыфікату папы Францішка.