Զուիցերացի 30 նոր պահակներու երդման արարողութիւնը յառաջիկայ 6 մայիսին։
Յառաջիկայ 6 մայիսին, Վատիկանի մէջ, Զուիցերացի 30 նոր պահակներ երդում պիտի կատարեն։
Վատիկանի ներքին գործոց նախարար` գերապայծառ Ճովաննի Անճելօ Պեչչու` որպէս Սրբազան Քահանայապետի
ներկայացուցիչ, կը գլխաւորէ երդման արարողութիւնը։ Այս տարուայ երդման արարողութեան հիւրն
է զուիցերական Շվից նահանգի ներկայացուցիչ` տիար Վալթեր Սդահլին։ Արարողութեան ներկայ
պիտի գտնուի նաեւ Զուիցերիոյ նոր դեսպանը տիար Իվ ֆուքս։ Յայտնենք որ Զուիրացի նոր
պահակներու երդման արարողութիւնը ամէն տարի տեղի կ'ունենայ 6 մայիսին։ Այդ թուականով
կը ոգեկոչուի ''Հռոմի աւարը'', որուն ընթացքին 6 մայիս 1527-ին Կարոլոս 5-րդի վարձազօրքը
կողոպտեց եւ աւարեց Յաւիտենական Քաղաքը։ Այդ յարձակումին ընթացքին 147 Զուիցերացի պահակներ
սպաննուեցան Կղմես Է. Քահանայապետը (1523-1534) պաշտպանելով։ Վատիկանի Զուիցերացի
պահակազօրքը, 103 հոգիէ բաղկացած, կազմաւորուած է 1527 թուականին։ Անոր անդամ զինուորներն
ու սպաները կը ծառայեն 2–20 տարի։ Դարերու ընթացքին անոնց համազգեստը փոփոխութիւն չի
կրեց, և այդ է պատճառը, որ միջնադարեան համազգեստներով պապական զինուորները մշտապէս կը
գրաւեն Վատիկան այցելող հիւրերու և զբօսաշրջիկներու ուշադրութիւնը։Վատիկանի զինուած ուժերը
կը համարուին աշխարհի ամենափոքրաթիւ զինուած ուժերէն մէկը: Զուիցերացի պահակները կ' ապահովեն
Հռոմի Պապի և անոր նստավայրի անվտանգութիւնը1506էն ասդին: Յայտնենք որ երկուշաբթի
5 մայիսի առաւօտեան Ֆրանչիսկոս Քահանայապետը ունկնդրութիւն պիտի շնորհէ Զուիցերական Պահակագունդին,
իսկ յետմիջօրէին նախատեսուած է մամլոյ ասուլիս, ժամասացութեան արարողութիւն ու ապա համերգ
եւ հիւրասիրութիւն։