Папа Францішак высока
цэніць і падтрымлівае дзейнасць Каталіцкага ўніверсітэта Святога Крыжа, гаворыцца
ў пасланні кардынала Дзяржсакратара Пьетра Параліна, скіраваным ад імя Пантыфіка 3
мая 2014 г. Нагодай для звароту да кіраўніцтва і студэнтаў адной з самых буйных навучальных
устаноў Еўропы стала правядзенне Дня Каталіцкага ўніверсітэта Святога Крыжа, які будзе
адзначацца ўжо ў дзевяносты раз 4 мая 2014 г. У пасланні за подпісам кардынала Дзяржсакратара
адзначаецца, што Касцёл заўсёды меў вялікую ўвагу да пытанняў аб сэнсе, праўдзе і
поўнай рэалізацыі, якія ўздымае моладзь, а каталіцкія навучальныя ўстановы даюць на
іх кваліфікаваныя адказы. Асаблівым чынам ён адзначыў ролю Каталіцкага ўніверсітэта
Святога Крыжа у дзейнасці якога злучаюцца навуковая строгасць і вернасць навучанню
Касцёла.
Папа Францішак жадае, каб універсітэт працягваў быць жывым і эфектыўным
сведкам працы Касцёла на карысць новых пакаленняў. Таксама, паводле кардынала Параліна,
Святы Айцец высока цэніць уклад Каталіцкага універсітэта ў супольнае дабро, прыкладам
чаго з’яўляецца дзейнасць рымскай клінікі “Джэмеллі”, якая адначасова з’яўляецца факультэтам
медыцыны і хірургіі гэтай навучальнай установы і “аказвае хворым дапамогу на найвышэйшым
навуковым узроўні сканцэнтраваную на годнасці чалавечай асобы”. Пантыфік выказаў жаданне
сустрэцца з хворымі і персаналам клінікі “Джэмеллі”, напісаў кардынал Дзяржсакратар.
Каталіцкі
ўніверсітэт Святога Крыжа быў заснаваны ў 1921 г. групай каталіцкіх святароў і навукоўцаў.
Яго галоўная сядзіба знаходзіцца ў Мілане. На сённяшні дзень ва ўніверсітэце дзейнічае
12 факультэтаў, якія даюць адукацыю ў розных сферах натуральных і гуманітарных навук.