Ֆրանչիսկոս Քահանայապետին Մայիս Ամսուայ ընթացքին գլխաւորած արարողութիւնները։

Մայիս ամսուայ վերջաւորութեան Ֆրանչիսկոս Սրբազան Քահանայապետը ուխտագնացութիւն պիտի կատարէ Սուրբ Երկիր ոգեկոչելու, հիսուն տարիներ առաջ տեղի ունեցած պատմական հանդիպումը ընդմէջ երջանկայիշատակ Պօղոս Զ-ի եւ Աթենակորաս Ա-ի։ Ֆրանչիսկոս Պապը Հռոմէն կը մեկնի շաբաթ 24 մայիսին ու կը վերադառնայ 26 մայիսին։
Բացի սովորական հրապարակային ունկնդրութիւններուն եւ կիրակնօրեայ Մարեմեան աղօթքներուն Ֆրաչիսկոս Քահանայապետը, Կիրակի 11 մայիսի առաւօտեան ժամը 9,30-ին, Սուրբ Պետրոսի Պազիլիքայի մէջ պիտի նախագահէ Քահանայական ձեռնադրութեան արարողութեան, հուսկ Կիրակի 18 մայիսի յետմիջօրէին, հովուական այցելութիւն պիտի կատարէ Հռոմի ''Տիվինօ Ամորէ - Աստուածային Սէր'' մարեմեան սրբավայրին։
Մինչ Կիրակի 25 մայիսին, Ֆրանչիսկոս Պապը, Բեթղեհէմի Քարայրին մէջ պիտի գլխաւորէ սուրբ պատարագի արարողութիւնը ու ապա նոյն վայրէն պիտի արտասանէ կիրակնօրեայ Մարեմեան աղօթքը։