Përfundon mbledhja e Këshillit të 8 kardinajve

Këshilli i tetë kardinajve, në mbledhje me Papën Françesku që nga e hëna, përfundoi punimet sot pasdite. Këto ditë është diskutuar për Këshillat Papnore, ndërsa sot paradite, kardinali Lorenco Baldiseri informoi mbi përgatitjen e Sinodit të Ipeshkvijve. Takimi i ardhshëm do të zhvillohet në fillim të qershorit.
Ndërkaq, Këshilli për Ekonominë do të mblidhet më 2 maj, në praninë e Atit të Shenjtë, i cili do t’i përshëndesë të pranishmit në fillim të punimeve. Argumenti kryesor i takimit do të jenë Statutet e vetë Këshillit dhe programi i punës. Nga ana tjetër, duke filluar nga nesër e deri më 3 maj, mblidhet në Shtëpinë e Shën Martës, në Vatikan, Komisioni i ri për mbrojtjen e të miturve. Përveç diskutimit mbi natyrën dhe qëllimet e Komisionit, do të flitet edhe për integrimin e tij me anëtarë, që përfaqësojnë të gjitha zonat gjeografike të botës. Edhe në këtë rast, Papa Françesku do të flasë në fillim të punimeve.