Papa në audiencën e përgjithshme: Zoti na dhëntë hirin e intelektit për t’i kuptuar
gjërat si Ai
Është hiri i intelektit ai, që u krijon njerëzve të fesë mundësinë ta lexojnë, e edhe
ta kuptojnë çdo gjë, me sytë e me zemrën e Zotit. Ky ishte mendimi kryesor i katekizmit
të Papës Françesku, mbajtur në audiencën e sotme të përgjithshme, në Sheshin e Shën
Pjetrit, në praninë e rreth 60 mijë shtegtarëve dhe besimtarëve.
Për t’i kuptuar
punët e jetës, përdorim inteligjencën, për t’i kuptuar punët e Zotit, kemi nevojë
për intelektin. E para është veti njerëzore, i dyti, dhuratë e Shpirtit Shenjt. Papa
Françesku shpjegoi dallimin ndërmjet dy fjalëve, që fjalorët i vlerësojnë si sinonime.
Por në përmasën e fesë nuk janë kështu. Në përmasën e fesë, ndërmjet intelektit e
inteligjencës është një greminë e thellë, sepse, shpjegoi Papa, ndryshe nga inteligjenca,
intelekti është hir hyjnor, që i jep të krishterit aftësinë për të depërtuar përtej
pamjes së jashtme të realitetit e për të shqyrtuar thellësitë e mendimit të vetë Zotit
e të planit të tij të shëlbimit: “Kjo dhanti na bën t’i kuptojmë gjërat,
ashtu si i kuptoi Zoti, si i kupton Zoti, me inteligjencën e Zotit. Sepse njëri mund
ta kuptojë një situatë edhe me inteligjencën njerëzore, me urti, e kjo nuk është gjë
e keqe. Por, ta kuptosh një situatë në thellësi, si e kupton Zoti, është pasojë e
kësaj dhantie. E Jezusi deshi të na dërgonte Shpirtin Shenjt, që ne ta kishim këtë
dhanti. E kështu, të gjithë të mund t’i kuptojmë gjërat, ashtu si i kupton vetë Zoti,
me inteligjencën e Zotit. Është dhuratë e bukur, që na e ka bërë Zoti ne të gjithëve”. Dhuratë,
që nuk do të thotë automatizëm, sepse për “intus legere” domethënë, “për të lexuar
brenda”, siç thoshin latinët, nga të cilët vjen edhe fjala “intelekt”, është e nevojshme
një jetë feje, me të cilën lidhet pazgjidhshmërisht ky hir, pohoi Papa, e shtoi: “Kur
Shpirti Shenjt banon në zemrën tonë, kur e ndriçon mendjen tonë, na ndihmon të rritemi
ditë pas dite në kuptimin e gjërave, që tha e që bëri bëri vetë Zoti”: “T’i
kuptosh mësimet e Jezusit, ta kuptosh Fjalën e Tij, ta kuptosh Ungjillin, ta kuptosh
Fjalën e Zotit! Njeriu mund ta lexojë Ungjillin, e edhe të kuptojë ndonjë gjë, por
nëse ne e lexojmë Ungjillin me këtë dhuratë të Shpirtit Shenjt, mund ta kuptojmë thellësinë
e Fjalës së Zotit. E kjo është dhuratë e madhe, dhuratë e madhe, që të gjithë duhet
ta kërkojmë, e ta kërkojmë së bashku: na e jep, o Zot, dhuratën e intelektit”. Një
dhuratë, që na krijon mundësinë t’i kuptojmë edhe punët e jetës, por të para në këndvështrimin
e Zotit, vijoi Papa e, në përfundim të katekizmit, solli shembullin e dishepujve të
Emausit që, të trishtuar, madje të dëshpëruar, kthehen në shtëpi, pa e njohur Jezusin,
që ecën përkrah tyre. E njohin vetëm atëhere, kur ai vetë nis t’u shpjegojë Shkrimet
e Shenjta, që kanë të bëjnë me vdekjen e ngjalljen e Tij. Vetëm në atë çast, kujtoi
Papa, mendjet e tyre ndriçohen e në zemra u rindizet shpresa e shuar: “E
kjo është vepra e Shpirtit Shenjt në ne: na e hap mendjen, na e hap, për t’i kuptuar
më mirë punët e Zotit, punët e njerëzve, situatat, të gjitha gjërat. Është tejet e
rëndësishme dhurata e intelektit për jetën tonë të krishterë. T’ia
lypim Zotit, që të na e japë, të na e japë ne të gjithëve këtë dhuratë, për të kuptuar,
ashtu si i kupton Ai, gjërat, që ndodhin e për të kuptuar, posaçërisht, Fjalën e Zotit
në Ungjill”. Në përmbledhjen e katekizmit në gjuhë të ndryshme, Papa Françesku
kujtoi disa herë Kanonizimin e Gjonit XXIII e të Gjon Palit II, duke përshëndetur
grupet e ndryshme të shtegtarëve, që vijojnë të vërshojnë çdo ditë si përrua, në Bazilikën
e Shën Pjetrit, për t’u gjunjëzuar para varreve të dy Papëve të Shenjtë. “Vizita juaj,
uroi Papa Françesku në përfundim të audiencës, qoftë rast i përshtatshëm për ta thelluar
përkatësinë tuaj në radhët e Popullit të shenjtë të Hyjit”.