Gjatë ditës së sotme Ati i Shenjtë mori pjesë në mbledhjen e tetë kardinajve këshilltarë

Edhe sot, si zakonisht, me përjashtim të ndonjë mungese për angazhime të veçanta, Ati i Shenjtë mori pjesë në mbledhjen e këshillit të tetë kardinajve, që ai vetë ka caktuar për reformën e kurjes romake. Në këtë mbledhje, tha drejtori i Sallës së Shtypit të Vatikanit Atë Federico Lombardi, mori pjesë edhe Sekretari i Shtetit të Vatikanit, Kardinali Pietro Parolin.
Sipas njoftimit të Atë Lombardit, kardinajtë, të cilët gjatë mbledhjeve të mëparshme kishin shqyrtuar Kongregatat e Kurjes Romake, tani po marrin në analizë Këshillet Papnore, fillimisht me shkëmbim mendimesh të përgjithshme e pastaj për secilin këshill në veçanti. Mund të pritet, shpjegon njoftimi, që gjatë këtij takimi “të plotësohet një paraqitje e parë e përsiatjeve për dikasteret”. Mbledhja e ardhshme e kardinajve do të mbahet më 1 – 4 korrik. Meqë ka ende shumë punë për t’u bërë, nuk duhet të presim që përfundimet të dalin brenda këtij viti, thotë në fund njoftimi.