Gjon Pali II. Udhëtimi në Meksikë: teologjia e çlirimit
Tre muaj pas zgjedhjes, Papa Gjon Pali II vendosi të shkojë në Meksikë. Këtij udhëtimi
të vështirë, ia kushtojmë emisionin e sotëm, në gjurmët e jetës së shenjtit polak,
sipas librit “Kam jetuar me një shenjt” të kardinalit Stanislau Xhivish, intervistuar
nga gazetari italian Gian Franco Svidercoschi. “Qe një vendim kundër rrymës –
pohon kardinali. Në Kurien romake, disa ishin kundër. Kundër, për shkak të gjendjes
meksikane kaq të ndërlikuar, por edhe për të gjitha të papriturat, që mund të karakterizonin
udhëtimin e parë. Etapa e parë, gati e rastësishme, e një shtegtimi, që do ta çonte
Atin e Shenjtë t’i binte shtatë herë rrotull tokës. Pikërisht! Një risi tjetër, diçka
e ndryshme e kësaj papnie. Që favorizoi si përmasën universale të katolicizmit, ashtu
edhe forcimin e lidhjeve ndërmjet Selisë së Shenjtë e Kishave lokale. A nuk ishte
edhe frenim i të ashtuquajturit “centralizëm romak”? Populli meksikan ka qenë
gjithnjë shumë fetar, por atëherë, Meksika dominohej nga një kastë masone e antiklerikale.
Papa, në fjalimin e tij para ipeshkvijve amerikanolatinë në Puebla, deshi të sqaronte
qëndrimin ndaj teologjisë së çlirimit, tepër e diskutuar në gjirin e Kishës, me përkrahës
e kundërshtarë po aq të zjarrtë. Gjon Pali II nuk e dënoi, por denoncoi problemet
që përmbante. “Marksizmi, përkrahës i luftës së klasave, i revolucionit me dhunë –
kujton kardinali Xhivish - natyrisht, nuk mund të përdorej si zgjidhje për të këqiat
e Amerikës Latine. Përveç kësaj, ekzistonte rreziku, mjaft real, që ilaçi të ishte
më i dëmshëm se vetë sëmundja. Por është e vërtetë se Gjon Pali II miratoi shprehimisht
një teologji çlirimi, që kishte “opcionin për të varfërit”, duke respektuar vendimin
e madh sipas Ungjillit, marrë nga Kisha amerikanolatine. E më vonë, pas publikimit
të Udhëzimeve të para të Kongregatës për Doktrinën e Fesë, që ndalej vetëm në aspektet
negative, Papa deshi – e përsëris – deshi një dokument të dytë, ku të viheshin në
dukje edhe anët e shumta pozitive të kësaj teologjie”. Pikërisht nga ai udhëtim
i parë në Meksikë, filluan përpjekjet për ta etiketuar Gjon Palin II: ishte konservator,
apo progresist; i majtë, apo i djathtë; bir i Koncilit, apo e kundërta e tij? Kardinali
Xhivish sqaron: “Ishte besnik ndaj Traditës, kjo po, natyrisht: por njëkohësisht
ishte edhe për dialog me rrymat e reja teologjike, për një konfrontim konstruktiv
ndërmjet fesë e arsyes, siç konfirmoi në enciklikën “Fides et ratio”. E as nuk u tërhoq
para sfidave të shoqërisë post-moderne, nga ndërlikimet, nga pluralizmi, por u përpoq
të korregjonte nga brenda kufizimet dhe problemet e tyre… përdori një gjuhë të re
e, siç bëri në tetor 1989, duke folur para Parlamentit të Evropës në Strasburg, ia
mbylli dyert çdo kthimi të mundshëm të ‘tundimit integralist’”.