Ватыкан: паштовая марка да 125-годдзя Чарлі Чапліна
Ватыканскае філатэлістычнае
і нумізматычнае бюро выпусціла паштовую марку прысвечаную 125-годдзю з дня нараджэння
вялікага кінаакцёра, сцэнарыста, кампазітара і рэжысёра Чарлі Чапліна. Яна з’явіцца
ў продажу 20 мая 2014 г. На марцы змешчаны чорны-белы фотаздымак акцёра ў яго самым
знакамітым вобразе – “Валацугі” з кароткімі чорнымі вусамі, у шляпе і з іранічнай
усмешкай. Кошт адной маркі – 70 еўрацэнтаў.
У каментары філатэлістычнага бюро
адзначаецца, што ў свой час Чарлі Чаплін здолеў паказаць несправядлівасць сучаснага
грамадства праз апавяданне аб прыгодах камічнага персанажа. “Чарлі Чаплін зрабіў фундаментальны
ўнёсак у трансфармацыю кінематографа з простага забаўляльнага відовішча ў новы сродак
камунікацыі, здольны распавесці і выказаць сітуацыі і падзеі вялікай і глыбокай складанасці”,
- адзначаецца ў паведамленні. Падкрэсліваецца таксама, што выпуск паштовай маркі да
125-годдзя знакамітага акцёра з’яўляецца належнай данінай чалавеку, праца якога адлюстравалася
на гісторыі ўсяго кінематографа.