Përvjetori i 21-të i vizitës së Gjon Palit II në Shqipëri: tri thirrje për shqiptarët
Sot, kur i gjithë populli shqiptar kujton 21-vjetorin e vizitës së Papës Gjon Pali
II në Shqipëri, nuk mund të mos përmendim të paktën tre raste, kur pikërisht Karol
Vojtila, që do të shpallet shenjt të dielën, e ngriti zërin në mbrojtje të shqiptarëve. Në
vitin 1980, nga Otranto e Italisë, foli për grigjën e vogël, të martirizuar nga komunistët
përtej detit: “Nuk mund të mos e hedh vështrimin përtej detit, jo larg, drejt
Kishës heroike në Shqipëri, që tronditet thellë nga persekutimi i ashpër e i zgjatur,
por edhe pasurohet nga dëshmia e martirëve të saj: ipeshkvij, meshtarë, rregulltarë
e rregulltare, e besimtarë të thjeshtë”(Homelia e meshës në Otranto, 5 tetor 1980). Më
1993, vetë Gjon Pali II e puthi këtë tokë të mbrujtur me gjakun e martirëve. Pikërisht
aeroporti i Rinasit, ku i Lumi Vojtila u ul në gjunjë për ta prekur me buzë, u ndërtua
nga të burgosurit politikë, shumë prej të cilëve e patën për varr. Më 25 prill, në
Sheshin Skënderbej të Tiranës, Ati i Shenjtë tha: “Ajo që ka ngjarë në Shqipëri,
të dashur vëllezër e motra, nuk ishte parë kurrë në historinë e njerëzimit… Drama
juaj, shqiptarë të dashur, i intereson e duhet t’i interesojë gjithë kontinentit evropian
dhe është e domosdoshme që Evropa mos t’ju harrojë. Në fakt, kjo duket se është prirja,
sot: të kthehet shpejt fleta, duke harruar atë që ishte, për të shikuar përpara. Qëndrim
që, në një farë këndvështrimi, është i drejtë e madje, i domosdoshëm, por me një kusht,
që të mbetet gjithnjë gjallë kujtimi i përvojës së mëparshme. Në të vërtetë, ky është
kushti i domosdoshëm për të mos u rikthyer tek të njëjtat gabime të përvajshme dhe
është premisa për një proces pajtimi të vërtetë… Një demokraci pa vlera…mund
të shndërrohet lehtësisht në një totalitarizëm të hapur ose të nëndheshëm, siç na
e tregon historia”. E rasti i tretë, që kujtojmë sot, janë Pashkët e vitit 1999.
Në mesazhin “Urbi et Orbi”, Papa Gjon Pali II bubullon: “I lutem Zotit të Ringjallur
t’i japë dhuratën e paqes, së pari tokës së martirizuar të Kosovës, ku lot e gjak
vazhdojnë të përzihen në një skenar dramatik urrejtjeje dhe dhune. Mendoj për ata
që janë vrarë, për ata që kanë mbetur pa shtëpi, për ata që janë larguar me forcë
nga familjarët, për ata që janë detyruar të ikin larg…”.