പാപ്പായുടെ പ്രസംഗങ്ങള്‍
ആദ്യവാല്യം പുറത്തിറങ്ങി
23 ഏപ്രില്‍ 2014, റോംകഴിഞ്ഞൊരു വര്‍ഷക്കാലം പേപ്പല്‍ വസതി ‘സാന്താ മാര്‍ത്ത’യില്‍ അനുദിനം നടത്തിയിട്ടുള്ള സുവിശേഷചിന്തകളാണ് പുസ്തകരൂപത്തില്‍ ആദ്യം വാല്യം പുറത്തിറങ്ങിയത്.
ഇറ്റാലിയന്‍ ഭാഷയില്‍ സ്വതസിദ്ധമായ ശൈലിയില്‍ പാപ്പാ പങ്കുവയ്ക്കുന്ന മൗലികചിന്തകളുടെ സമാഹാരത്തിന് La verità è un Incontro,
Truth is an Encounter, ‘സത്യത്തിന്‍റെ നേര്‍ക്കാഴ്ച’ എന്നാണ് പേരിട്ടിരിക്കുന്നത്.
സ്ഥാനാരോപിതനായശേഷം കഴിഞ്ഞ 13 മാസങ്ങളില്‍ 186 പ്രഭാതപൂജകളില്‍ പാപ്പാ പങ്കുവച്ച ചിന്തകളാണ് 556 താളുകളുള്ള വലിയ വാല്യമായി റോമിലെ Rizzoli പ്രസാധകര്‍ ഏപ്രില്‍ 24-ന് പ്രകാശനംചെയ്യുമെന്ന് പരിശുദ്ധ സിംഹാസനത്തിന്‍റെ വക്താവ് ഫാദര്‍ ഫ്രെദറിക്കോ ലൊമ്പാര്‍ഡി അറിയിച്ചു. പുസ്തകത്തിന് 1200 രൂപയാണ് വില.
ആമുഖം എഴുതിയിരിക്കുന്നത് വത്തിക്കാന്‍ റേഡിയോയുടെ ഡയറക്ടര്‍ ജനറല്‍ കൂടിയായ ഫാദര്‍ ലൊമ്പാര്‍ഡിയാണ്. സമര്‍പ്പണം, വത്തിക്കാന്‍ പ്രസിദ്ധീകരണമായ Civilta Catholica-യുടെ പത്രാധിപര്‍ ഫാദര്‍ അന്തോണിയോ സ്പദാരോയുടേതുമാണ്.
ക്രിസ്തു ലോകത്തിന്‍റെ പ്രകാശവും സത്യവുമാണെങ്കില്‍, അവിടുത്തെ വചനങ്ങള്‍ സത്യവും സത്യത്തിന്‍റെ പ്രകാശവുമാണ്. ഈ അര്‍ത്ഥത്തിലാണ് പാപ്പാ ഫ്രാന്‍സിസ് അനുദിനം പങ്കുവയ്ക്കുന്ന സുവിശേഷ ചിന്തകളെ ‘സത്യത്തിന്‍റെ നേര്‍ക്കാഴ്ച’യെന്ന് പ്രസാദകര്‍ ശീര്‍ഷകത്തില്‍ വിശേഷിപ്പിച്ചിരിക്കുന്നതെന്ന് ഫാദര്‍ ലൊമ്പാര്‍ഡി റോമില്‍ ഇറക്കിയ പ്രസ്താവനയില്‍ വെളിപ്പെടുത്തി. പാപ്പായുടെ വചനചിന്തയുടെ ശബ്ദരേഖയുടെ സിഡിയുള്ള പതിപ്പും ഉടനെ പുറത്തിറങ്ങുമെന്ന് പ്രസാധകര്‍ അറിയിച്ചു.
| All the contents on this site are copyrighted ©. |