Infermieri, që mjekoi Karol Vojtilën pas atentatit: i printe Zoti, edhe në vuajtje
13 maji 1981, data e atentatit kundër Gjon Palit II, do të mbetet përgjithnjë në kujtesën
e historisë së njerëzimit.Në orën 17.17 Papa Vojtila qëllohet nga dy plumba, nisur
kundër tij në Sheshin e Shën Pjetrit nga pistoleta e Mehmet Ali Agçait. Gjon Pali
II, i ligështuar, nis të lëkundet në xhipin e tij. Për rreth, frikë, mosbesim. Niset
menjëherë në rojen mjekësore të Vatikanit. E presin kirurgu, profesor Enriko Fedele
dhe Leonardo Porcia, infermieri, që e rroku Papën, për ta vënë mbi barelë.
E mbeti me të, derisa u shtrua në Poliklinikën Gemelli. Sot, në mikrofonin tonë, kujton
pikërisht atë ditë…
Përgjigje: - Atë ditë isha me shërbim në ambulancën
kirurgjike, kur papritmas vjen një komunikim: “Kanë qëlluar Papën! Po hyn në Harkun
e Këmbanave për të ardhur tek Mjeku i Rojës!”. Njoftova menjëherë kirurgun, profesor
Fedelen, që ishte atë çast me shërbim. Të gjithë, edhe mjekët e tjerë, dolën në mes
të rrugës… Arriti xhipi i Atit të Shenjtë…
Pyetje: - Si e jetuat çastin,
kur dëgjuat në radio se ishte plagosur Papa?
Përgjigje: - Na u duk gjë
e tmerrshme, kur dëgjuam se ishte plagosur Papa. U vu në lëvizje gjithë ambulanca.
Pyetje:
- Nga kush u ndihmua së pari, aty për aty?
Përgjigje: - Nga unë.
Kishim ambulancën pranë, nxora jashtë barelën dhe e rroka, e shtrëngova në gjoksin
tim, ashtu si ishte, mbi xhip, e e vura mbi barelë. Kirurgu pa plagën: duke vlerësuar
dëmin e shkaktuar, do të merrej edhe vendimi për ta çuar në Spitalin e Shpirtit Shenjt,
ose në Poliklinikën Gemelli… e mbylla plagën e Papës me një shuk garze.
Pyetje:
- E pastaj u nisët në Gemelli me ambulancë. Kush ishte aty?
Përgjigje:
- Ishte shoferi, kamerieri Gugel, drejtori shëndetësor, Buzzonetti, drejtori i
Fasit (Shërbimit Shëndetësor të Vatikanit) kirurgu e unë... Ishim nja gjashtë a shtatë
vetë.... Dolëm nga Porta e Shën Anës e shkuam drejt e në Gemelli. Në katin e nëntë.
Në vend që të hyja drejtpërdrejt në sallën e operacionit, e lashë në dhomën ku përgatiten
pacientët... Ia hoqa të gjitha veshjet, i vura një një saketë plastike e ia dorëzova
Gugelit ..
Pyetje: - E takuat përsëri, pas operacionit? Kur vinte të
bënte analizat në laboratorin e Vatikanit?
Përgjigje: - Kur vinte atje,
më thoshte: “Unë ju njoh!”. Ma tha këtë tri a katër herë. E unë “Eh Shenjtëri, po!”.
Por nuk më bënte goja t’i thosha: ‘Jam ai, i asaj dite, kur…”.
Pyetje:
- Ç’mbresë ju la Papa i plagosur? Përgjigje: - Mbresën e një njeriu
të vuajtur, por njëkohësisht, edhe të udhëhequr nga Zoti, njeriut të hirit. E ma la
në shpirt këtë hir edhe mua, që pata fatin ta mbajë në krahë në çastin më dramatik
të jetës së tij!