2014-04-21 14:41:15

Mwanga wa Kristo mfufuka ulete furaha, faraja na matumaini!


Baba Mtakatifu Francisko, Jumatatu ya Pasaka, tarehe 21 Aprili 2014 wakati wa Sala ya Malkia wa Mbingu, kwenye Uwanja wa Kanisa kuu la Mtakatifu Petro, mjini Vatican, ameendelea kuwatakia waamini na watu wote wenye mapenzi mema kheri na baraka kwa Siku kuu ya Pasaka, kwani hii ndiyo Siku aliyoifanya Bwana, chemchemi ya furaha na matumaini mapya hata kwa mitume wa Yesu waliopashwa habari kwamba, hakika Yesu amefufuka, changamoto na mwaliko kwa waamini kuacha chapa hii ya Injili kujikita katika mioyo na maisha yao yote!

Baba Mtakatifu anasema mwanga huu hauna budi kwanza kabisa kububujika kutoka katika undani wa moyo wa mtu mwenyewe, kama ilivyokuwa kwa Magdalena, aliyekuwa analia kwa kumkosa Yesu na kwamba, macho yake hayakuamini alipokutana uso kwa uso na Kristo Mfufuka, kiasi kwamba, amekuwa ni shahidi wa Kristo Mfufuka, chanzo cha maisha mapya na mwaliko wa kupeleka mwali wa Kristo mfufuka katika medani mbali mbali za maisha ya watu: kwa watu wenye furaha waweze kuwa na furaha zaidi kwa kuwaondolea ubinafsi na wale wanaoteseka na kuhuzunika wapate faraja na matumaini mapya.

Baba Mtakatifu anasema, Bikira Maria aliteseka sana pale upanga wa huzuni ulipopenya moyoni mwake, lakini furaha ya kufufuka kwa Mwanaye Mpendwa Yesu Kristo, ilikuwa ni kubwa kiasi kwamba, mitume waliweza kuchota furaha hii kutoka kwa Bikira Maria. Mateso, kifo na ufufuko wa Kristo ni kielelezo cha hali ya juu cha upendo wa Mungu, kiasi kwamba, Moyo Mtakatifu wa Bikira Maria umekuwa ni chemchemi ya: amani, faraja, matumaini na huruma. Ukuu wa Bikira Maria unapata utimilifu wake kwa kushiriki katika Pasaka ya Kristo, daima ameendelea kuwa ni Mama wa mateso na matumaini; Mama wa mitume na Kanisa.

Bikira Maria ni shahidi wa mateso, kifo na ufufuko wa Yesu Kristo. Baba Mtakatifu anawaalika waamini kumkimbilia katika Kipindi hiki cha Pasaka ili kuwashirikisha furaha ya Pasaka. Mwishoni, Baba Mtakatifu amewatakia waamini, mahujaji na wageni wote waliofika kwenye Uwanja wa Kanisa kuu la Mtakatifu Petro mjini Vatican furaha ya Kristo Mfufuka.







All the contents on this site are copyrighted ©.