Françesku në mesazhin Urbi et Orbi, Romës e Botës: “Dashuria bën të lulëzojë shpresa
në shkretëtirë”
“Dashuria bën të lulëzojë shpresa në shkretëtirë”: me këtë siguri plot gëzim
në zemër, në ditën e Pashkëve, Papa Françesku u lut të marrë fund çdo luftë e çdo
armiqësi në botë e Zoti t’i ngushëllojë të gjithë njerëzit, që vujanë. Zëri i Atit
të Shenjtë jehoi përsëri me forcë, nga lozha qendrore e Bazilikës së Vatikanit, në
mesazhin tradicional “Urbi et Orbi” – “Romës e Botës”, drejtuar pas Meshës, kremtuar
në Bazilikën e Shën Pjetrit, turmës pa fund të besimtarëve, që ishin dyndur sot në
Shesh, duke mbushur përplot edhe Rrugën e Pajtimit. Në Qytetin e Amshuar ndjehej fort
fryma e Ngjalljes së Zotit!
“Krishti u
ngjall… ejani e shikoni. Ky është kumti i Ungjillit, është vetë Lajmi i Mirë, në bazë
të fesë sonë e të shpresës sonë, kujtoi Françesku: “Nëse Krishti nuk do të
ishte ngjallur, Krishterimi do ta humbiste vlerën e tij; gjithë misionit të Kishës
do t’i sosej frymëzimi, sepse prej aty u nis e riniset gjithnjë”. Ky është
mesazhi, që të krishterët ia përcjellin botës: “Jezusi, Dashuria, ngadhënjeu
mbi urrejtjen, mëshira mbi mëkatin, e mira mbi të keqen, e vërteta mbi gënjeshtrën,
jeta mbi vdekjen”. Prandaj, në çdo situatë njerëzore, mbi të cilën rëndon
mëkati e brishtësia, Lajmi i Mirë nuk është thjesht fjalë, por dëshmi e dashurisë
besnike, pa asnjë shpërblim: “…është dalje nga vetvetja, për të shkuar e
për të takuar tjetrin, është të jesh pranë të plagosurit nga jeta, të ndash gjithçka
me njeriun, që i mungojnë gjërat më të nevojshme; t’i rrish pranë të sëmurit, plakut,
të braktisurit”. Kjo siguri, plot gëzim, e mbush plot zemrën e çdo të krishteri:
“Dashuria është më e fortë, Dashuria jep jetë, Dashuria bën të lulëzojë
shpresa në shkreti”. Me këtë siguri të gëzueshme në zemër, sot
të drejtohemi ty, o Zot i Ngjallur, vijoi Papa, duke iu lutur Krishtit të na ndihmojë
për ta shëruar plagën e urisë, rënduar nga konfliktet dhe shpërdorimet e pamasa, për
të cilat shpesh jemi fajtorë; për të mbrojtur të pambrojturit, posaçërisht fëmijët,
gratë, pleqtë, shpesh objekt i shfrytëzimit e i braktisjes; për t’i mjekuar vëllezërit
e goditur nga epidemia e ebolës në Guine, Sierra Leone e Liberi, e edhe të tjerët,
të prekur nga sëmundjet, që përhapen edhe për shkak të mungesës së mjekimeve e të
varfërisë së plotë; për t’i ngushëlluar ata, që sot nuk mund t’i kremtojnë Pashkët
me të dashurit, sepse të detyruar të shkëputen padrejtësisht nga dashuria e tyre,
ashtu edhe njerëzit e tjerë të shumtë, meshtarë e laikë, të rrëmbyer në vende të ndryshme
të botës: “Të lutemi, o Jezus i lumnueshëm, premto të pushojë çdo luftë,
çdo armiqësi e madhe a e vogël, e vjetër a e re”. Françesku nuk i harroi
vendet e shumta, të tronditura nga konfliktet e përçarjet, posaçërisht Sirinë, duke
bërë thirrje për ata që vuajnë, që të mund të marrin ndihmat e nevojshme humanitare:
“…e palët në ndeshje të mos e përdorin më forcën për të mbjellë vdekje, posaçërisht
kundër popullsive të pambrojtura, por të kenë guximin të bisedojnë për paqen, që pritet
tashmë prej shumë kohe”. E akoma, i lypi Zotit ngushëllim për viktimat
e dhunës vëllavrasëse në Irak e mbështetje për shpresat, që ngjalli rifillimi i bisedimeve
ndërmjet izraelitëve e palestinezëve. Në vijim, lutja që të marrin fund ndeshjet
në Republikën Qendrafrikane e të ndalen atentatet e egra terroriste në disa zona të
Nigerisë e dhuna në Sudanin e Jugut e që shpirtrat të kërkojnë pajtimin e harmoninë
vëllazërore në Venezuelë. Pastaj, një mendim i veçantë për Ukrainën:
“ që të gjitha palët e interesuara, të ndihmuara nga Bashkësia Ndërkombëtare, të rifillojnë
përpjekjet për ta ndaluar dhunën e për të ndërtuar, me shpirtin e unitetit e të dialogut,
ardhmërinë e vendit”. Në përfundim, lutja për mbarë botën: “Për
të gjithë popujt e Tokës, të lutemi, o Zot: Ti, që ngadhënjeve mbi vdekjen, na e jep
jetën tënde, na e jep paqen tënde!”. Në përfundim, urimi drejtuar mbarë
besimtarëve të botës, me të cilin ne e nisëm programin tonë të sotëm.