Візіт Папы ў цэнтр для састарэлых і інвалідаў – жэст пяшчоты да свету пакут
“Абмыццё ног з’яўляецца
простым і пераканаўчым жэстам Касцёла, які ад самага пачатку пакліканы да апранання
на сябе “фартух слугі”, да адчувальнасці і блізкасці да старых і новых форм беднасці
і слабасці – не толькі з філантропскіх меркаванняў, але дзеля любові да Евангелля”,
- падкрэсліў кс. Анджэла Бацары, кіраўнік Фонду Дона Ньёкі, да якога належыць рымскім
цэнтр “Santa Maria della Provvidenza”. Тут у Вялікі Чацвер 17 красавіка 2014 г. папа
Францішак узначаліць Святую Імшу Вячэры Пана і здзейсніць абрад абмыцця ног.
Святар
успрымае жэст Пантыфіка як адлюстраванне яго “чулай пяшчоты” да свету пакут і евангельскай
міласэрнасці, як напамін пра тое, што ўзровень цывілізаванасці грамадства варта вымяраць
на аснове яго здольнасці забяспечыць развіццё ў рытме адаптаваным да апошніх і самых
слабых.
Як вядома, год таму Папа ўзначаліў літургію Вячэры Пана ў рымскай
турме для непаўналетніх “Casal del Marmo”, дзе абмыў ногі 12 зняволеным розных нацыянальнасцяў
і рэлігій, сярод якіх былі і мусульмане.
Цэнтр “Santa Maria della Provvidenza”
знаходзіцца пад апекай фонду, названага ў гонар благаслаўлёнага айца Карла Ньёкі.
Ён мае 150 месцаў, з якіх 60 прызначаны для людзей, якім немагчыма аказаць належнай
апекі дома, 60 – для асоб, што падлягаюць шырокай рэабілітацыі з высокім узроўнем
дапамогі, 30 ложкаў – для пацыентаў, якія маюць патрэбу ў нейраматорнай рэабілітацыі.