Siri: zbulohet shkretimi i kishave dhe përdhosja e ikonave
Pas rimarrjes së qytetit të krishterë të Maalulës – 55 kilomentra në verilindje të
Damaskut – nga ushtria qeveritare siriane, filmimet dhe përshkrimet që nxorën në qarkullim
burimet qeveritare dhe agjencitë ndërkombëtare të lajmeve dokumentojnë shkretimin
e vendeve të krishtera të kultit përgjatë katër muajve pushtim nga ana e trupave kryengritëse.
Dëmet më të mëdha i ka pësuar shenjtërorja greko-melkite e Mar Sarkis, ku kisha është
shkretuar, dyshemeja u gjet e mbuluar me objekte devocionale, figura dhe libra të
shenjtë të dëmtuar, ndërsa ikonat e ruajtura në sakristi nuk gjenden më. Është zhdukur
edhe këmbana dhe kryqi, që ishte mbi kupolën e kuvendit. Shenjtërorja e themeluar
në shekullin V i kushtohet Shën Sergjit e Bakut, ushtarë romakë të martirizuar për
shkak të fesë nën perandorin Galer (250-311). Para se të përçudnohej nga lufta
civile, në fshatin shkëmbor të Maalulës – që sot është i braktisur – jetonin 5 mijë
sirianë, shumica të krishterë. Rimarrja e Sarkës, Maalulës dhe Xhibehut u bë e
mundur pas sulmeve të ushtrisë qeveritare siriane, që kishin si synim vënien nën kontroll
të tërë territorit të Kalamunit, ku kalon edhe rruga strategjike nëpër të cilën kryengritësit
transportonin armët për fortesat e tyre në afërsi të Damaskut.