Աւագ շաբթուայ ընթացքին Երուսաղէմի մէջ կը սպասուի աւելի քան 125 հազար ուխտաւորներու
ներկայութիւնը։
''Կաթողիկէներն ու օրթոտոքսները միասնաբար կը տօնախմբեն 2014-ի Զատիկը''։
Իսրայէլեան
զբօսաշրջիկութեան նախարարութեան գնահատումով, Ս. Շաբաթուայ արարողութիւններուն կ՛ակնկալուի
աւելի քան 125 հազար հաւատացեալ-ուխտաւորներու մասնակցութիւնը։ Շաբաթ 19 ապրիլին`
Յոյն Օրթոտոքս ս. Թաղման եկեղեցւոյ մէջ տեղի ունեցող կրակավառութեան արարողութեան կը
նախատեսուի աւելի քան 40 հազար հաւատացեալներու ներկայութիւնը։ Ծաղկազարդի ուռօրհնէքի
արարողութեան ու ձիթենեաց լեռնէն հին Երուսաղէմ քաղաք կատարուած թափօրին` մասնակցած
են 60 հազար հաւատացեալ, որոնցմէ 25 հազարը կղերական։ Աւագ Հինգշաբթի օրը ոտնլուայի
արարողութենէն ետք թափօր կը կատարուի դէպի Սիոն լեռը ուր Գեթսեմանիի պարտէզին մէջ նախատեսուած
է խաւարման գիշերուայ ժամասացութիւնը։ Աւագ Ուրբաթ օրը, ամէն դաւանանքի պատկան քրիստոնեաները
կը մասնակցին ''ճանապարհ խաչի'' բարեպաշտական արարողութեան։ Նշենք որ այս տարուայ
Զատիկը հաւատացեալ ուխտաւորներու ներկայութիւնը աւելի զգալի է քանի արեւմուտքի ու արեւելքի
եկեղեցիները միասնաբար եւ նոյն թուականին կը տօնեն Յիսուսի փառաւոր Յարութեան տօնը։