Патрыярх Канстантынопальскі перад сустрэчай з папам Францішкам
Прадстаяцелі Цэркваў
павінны зрабіць рашучыя крокі да паяднання падзеленага хрысціянства і рэагаваць на
неадкладныя патрэбы нашага часу, лічыць Патрыярх Канстантынопальскі Барталамей І.
У маі ў Іерусаліме ён сустрэнецца з папам Францішкам. Праваслаўны іерах, у інтэрв’ю
інфармацыйнаму агенцтву італьянскага епіскапата, выказаў задавальненне тым, што Пантыфік
прыняў яго прапанову аб спатканні ў Святой Зямлі ў 50-годдзе гістарычнай сустрэчы
паміж папам Паўлам VI і Патрыярхам Афінагорам. “Дыялог любові”, які яны распачалі,
прывёў да “дыялогу праўды” паміж дзвюма нашымі “брацкімі Цэрквамі”, сказаў Барталамей
І. Сустрэча з Папам з’яўляецца важным імператывам, каб засведчыць агульныя імкненні
і гаварыць у адзін голас, як Хрысціянскія Цэрквы Усходу і Захаду, аб праблемах, што
перашкаджаюць жыццю вернікаў і ўсіх людзей ва ўсім свеце, падкрэсліў Патрыярх.
Ён
нагадаў, што браў удзел у інаўгурацыі пантыфікату Францішка, чаго не адбывалася ніколі
ў гісторыі. Пантыфік з’яўляецца лідэрам шчырым і альтруістычным, якому неабыякава
пытанне падзелу хрысціян і пакут сённяшняга свету, лічыць Прадстаяцель. Ён прызнаў,
што агульны шлях абедзвюх Цэркваў за апошнія 50 гадоў не быў лёгкі, але, нягледзячы
на гэта, “дух братэрскай і паважлівай любові на шчасце заняў месца старой палемікі,
правакаванай падазрэннямі і асуджэннем”. На тэалагічным узроўні нарадзілася некалькі
важных сумесных дакументаў, якія сталі плёнам працы міжнароднай камісіі па дыялогу
паміж Цэрквамі.
Шмат чаго яшчэ трэба зрабіць, і дарога будзе доўгай, аднак,
трэба па ёй ісці, нягледзячы на цяжкасці, бо няма ніякай альтэрнатывы для яе, адзначыў
Барталамей І перад сваім спатканнем са Святым Айцом Францішкам.