Святы Айцец: аборт і дзетазабойства – жудасныя злачынствы
Чалавечае жыццё сакральнае
і непарушнае, нагадаў папа Францішак падчас сустрэчы з членамі італьянскага “Руху
ў абарону жыцця”, якіх прыняў на аўдыенцыі ў Ватыкане. Каля 500 актывістаў сабраліся
11 красавіка 2014 г. у Клеменційскай зале Апостальскага палацу, разам са сваім кіраўніцтвам.
Паводле Папы, “кожны грамадзянскі закон абапіраецца на прызнанне першага і фундаментальнага
права – права на жыццё, якое не падпарадкавана ніякім умовам: ні якасным, ні эканамічным
ні, тым больш, ідэалагічным”. “Як запаведзь “не забей” ставіць яснае абмежаванне
дзеля пацвярджэння каштоўнасці чалавечага жыцця, так сёння мы павінны сказаць “не”
эканоміцы выключэння і няроўнасці”. Такая эканоміка забівае… Яна разглядае чалавека
як дабро да спажывання, якое можна выкарыстасць, а затым выкінуць. Мы далі пачатак
культуры “адходаў”, якая падтрымліваецца”. І так у адходы пераўтвараюцца таксама і
жыцці”, - сказаў Папа.
На думку Святога Айца, адной з самых вялікіх рызыкаў
нашай эпохі, з’яўляецца “развод” паміж эканомікай і мараллю, паміж магчымасцямі прапанаванымі
рынкам напоўненым тэхналогіямі і ў якім усё больш незаўважнымі становяцца элементарныя
этычныя нормы.
Францішак заклікаў падтрымліваць рашучую апазіцыю ўсім формам
замахаў на жыццё, асабліва на нявіннае і безабароннае. Ён нагадаў словы ІІ Ватыканскага
Сабора пра тое, што “жыццё, аднойчы зачатае, павінна абараняцца з максімальным клопатам;
а аборт і дзетазабойтсва – гэта жудасныя злачынствы”.
Паводле Пантыфіка, хрысціяне
павінны даваць евангельскае сведчанне, якое заключаецца ў любові да жыцця і яго адважнай
абароне на ўсіх этапах. Ён заклікаў рабіць гэта праз блізкасць, спрыяючы таму, каб
кожная жанчына адчавала сябе асобай выслуханай, прынятай і якую суправаджаюць. Таксама
Папа заклікаў памятаць пра пажылых людзей, жыццё якіх павінна абараняцца.