Папа: гандаль людзьмі – злачынства супраць чалавецтва

Гандаль людзьмі – гэта рана на целе сучаснага чалавецтва і рана на целе Хрыста, лічыць папа Францішак. 10 красавіка 2014 г. ён сустрэўся з удзельнікамі ІІ Міжнароднай канферэнцыі на тэму гандлю людзьмі, якая праходзіла ў Ватыкане 9-10 красавіка 2014 г. Форум быў арганізаваны Папскай акадэміяй сацыяльных навук і Канферэнцыяй Біскупаў Вялікабрытаніі. Ініцыятарам яго правядзення выступіў сам Святы Айцец. У мерапрыемстве прынялі ўдзел каля 120 экспертаў з 22 краін свету, а таксама прадстаўнікі Інтэрпола і Еўрапола. Звяртаючыся да сабраных, Папа назваў гандаль людзьмі “злачынствам супраць чалавецтва”. “Сам факт нашай прысутнасці тут з мэтай аб’яднання сіл, азначае жаданне, каб стратэгіі і кампетэнцыі суправаджаліся і ўмацоўваліся евангельскім суперажываннем, блізкасцю да людзей, якія сталі ахвярамі гэтага злачынства”, - падкрэсліў Францішак. Ён назваў канферэнцыю не проста падзеяй, але жэстам з боку Касцёла і людзей добрай волі, якія жадаюць сказаць феномену гандлю людзьмі рашучае “хопіць”.

Святы Айцец высока ацаніў удзел у форуме прадстаўнікоў двух розных падыходаў да барацьбы з гандлем людзьмі – паліцэйскіх і прадстаўнікоў гуманітарных арганізацый. Прыярытэтам першых з’яўляецца барацьба са злачыннасцю з дапамогай закона, а другіх – аказанне дапамогі і дзяленне чалавечым цяплом з ахвярамі, адзначыў ён. “Гэта два розныя падыходы, але яны могуць і павінны ісці разам”, - сказаў Папа і заклікаў удзельнікаў канферэнцыі да супрацоўніцтва. Той факт, што ватыканскае мерапрыемства на тэму гандлю людзьмі праходзіць ужо другі раз, на думку папы Францішка, сведчыць аб яе важнасці для ўмацавання такога ўзаемадзяння.